Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Mbledhja e Këshillit Bashkiak të Maliqit është shoqëruar sot me tensione, ndërsa në rend të ditës ishte draftligji i qeverisë për shkrirjen e kësaj bashkie dhe bashkimin e saj me Korçën.
Sipas burimeve për mediat, këshilltarët e opozitës kanë kërkuar që Këshilli Bashkiak të shprehej menjëherë kundër draftit të qeverisë. Ndërkohë, këshilltarët e shumicës socialiste kanë kërkuar më shumë kohë për t’u njohur me përmbajtjen e dokumentit, duke argumentuar se nuk ishin ende të qartë për të gjitha detajet e tij.
Kërkesa për shtyrjen e diskutimit dhe mbylljen e mbledhjes është kundërshtuar nga të pranishmit. Situata është tensionuar, ndërsa disa prej tyre kanë goditur tavolinat me duar dhe kanë kërkuar që mbledhja të vijonte.
Momenti më i tensionuar ka qenë përplasja me kryetarin e Këshillit Bashkiak. Një i moshuar, i cili mbante një bastun, është afruar pranë tij dhe e ka shtyrë, duke i kërkuar me tone të larta që të ulej në vend.
Përplasjet kanë vijuar për shkak të qëndrimeve të ndryshme mbi draftligjin që parashikon ndryshimin e statusit të Bashkisë Maliq dhe bashkimin e saj me Korçën.
Debati për riorganizimin territorial ka shkaktuar reagime edhe në komunitetin lokal, ndërsa këshilltarët e opozitës kërkojnë një qëndrim të qartë kundër nismës së qeverisë dhe shumica socialiste kërkon kohë për shqyrtimin e dokumentit.
