Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Protestat e ditëve të fundit në kryeqytet kanë sjellë përplasje mes protestuesve dhe policisë, dëmtime të pronës dhe shqetësim të gjerë publik. Në një situatë të tillë, vëmendja nuk mund të përqendrohet vetëm te deklaratat politike apo te veprimet e forcave të rendit. Një rol thelbësor ka edhe Prokuroria e Tiranës, e cila duhet të hetojë veprat penale brenda kompetencave të saj dhe të sigurojë që ligji të zbatohet për të gjithë.
Në krye të këtij institucioni është Arenc Çela. Përballë një situate që shqetëson qytetarët, lind një pyetje e ligjshme se çfarë po bën Prokuroria e Tiranës për të hetuar episodet e dhunës dhe pse publiku nuk ka marrë ende një informacion të qartë nga drejtuesi i saj?
E Vërteta.al i është drejtuar Prokurorisë që dje
Redaksia e E Vërteta.al i ka dërguar që dje një kërkesë zyrtare për informim Prokurorisë së Tiranës, për të marrë të dhëna mbi veprimet e ndërmarra lidhur me episodet e dhunës gjatë protestave.
Në një situatë të tillë, çështja nuk lidhet vetëm me respektimin e afateve ligjore për kthimin e përgjigjes. Bëhet fjalë edhe për interesin e lartë publik për të kuptuar nëse po hetohen të gjitha rastet e dhunës, nëse po verifikohen pretendimet për përdorim të tepruar të forcës nga punonjës policie dhe nëse personat përgjegjës po identifikohen, pavarësisht se në cilën anë ndodhen.
Qytetarët kanë të drejtë të informohen për veprimtarinë e institucioneve të drejtësisë, veçanërisht kur ngjarjet prekin sigurinë publike dhe të drejtën për të protestuar.
Prokuroria nuk mund të bëjë publike të dhëna që cenojnë hetimet apo prezumimin e pafajësisë. Por, kjo nuk e përjashton mundësinë e një komunikimi institucional mbi çështjet e regjistruara dhe veprimet që mund të bëhen publike në përputhje me ligjin.
Pse nuk ka ende një komunikim publik nga drejtuesi i Prokurorisë së Tiranës? Çfarë po bëhet për të hetuar dhunën dhe për të garantuar që ligji të zbatohet njësoj për të gjithë?
Këto janë pyetje që kërkojnë përgjigje, jo për të ndërhyrë në hetime, por sepse transparenca dhe llogaridhënia janë thelbësore për besimin e qytetarëve te drejtësia.
Nga prokuror në Lushnjë dhe Berat, në krye të Prokurorisë së Tiranës
Arenc Çela ka nisur karrierën si prokuror më 4 tetor 2006, pas studimeve në Fakultetin e Drejtësisë dhe Shkollën e Magjistraturës.
Gjatë karrierës së tij ka punuar në Prokurorinë e Lushnjës dhe atë të Beratit. Më pas ka mbajtur funksionin e zv.drejtuesit të Prokurorisë për Krime të Rënda, ndërsa në vitin 2020 është komanduar si ndihmës-magjistrat në Prokurorinë e Përgjithshme.
Në vitin 2022, Këshilli i Lartë i Prokurorisë e caktoi në drejtimin e Prokurorisë së Tiranës. Më 9 janar 2026, KLP miratoi vendimet për riemërimin e tij në këtë pozicion, pas shqyrtimit të vlerësimit të veprimtarisë së tij si drejtues dhe verifikimit të pasurisë e figurës.
Çela drejton një nga institucionet më të rëndësishme të ndjekjes penale në vend. Për këtë arsye, mënyra se si institucioni reagon dhe komunikon në situata të tensionuara është me interes të drejtpërdrejtë për publikun.
Si e kaloi vettingun?
Çela u konfirmua në detyrë nga Komisioni i Pavarur i Kualifikimit më 23 mars 2021, me shumicë votash. Procesi, megjithatë, u shoqërua me një mendim kundër nga anëtarja e trupit gjykues Xhensila Pine.
Sipas vendimit të KPK-së dhe raportimit të BIRN/Reporter.al, një nga çështjet kryesore të shqyrtuara ishte blerja e një apartamenti në Tiranë, me sipërfaqe rreth 67 metra katrorë, plus 9 metra katrorë në bashkëpronësi, me vlerë 60,800 euro në vitin 2008.
Për blerjen, Çela kishte deklaruar të ardhura nga pagat e tij dhe të bashkëshortes, një kredi prej 3 milionë lekësh dhe hua nga familjarë. Shumica e trupit gjykues i konsideroi të provuara burimet e ligjshme të krijimit të pasurisë dhe vendosi konfirmimin e tij në detyrë.
Por Xhensila Pine mbajti qëndrim të kundërt. Në mendimin e saj të pakicës, ajo argumentoi se Çela dhe bashkëshortja nuk kishin burime të mjaftueshme financiare për të justifikuar pagesën e këstit të parë prej 18 mijë eurosh. Ajo ngriti pikëpyetje edhe për disa prej burimeve të deklaruara të kursimeve dhe huave.
Mendimi i pakicës trajtoi gjithashtu çështje të tjera që lidheshin me pasurinë dhe aftësitë profesionale të prokurorit.
Pine ngriti pikëpyetje për përdorimin e një automjeti gjatë periudhës 2010–2016, i cili rezultonte në pronësi të kunatit të Çelës, por për të cilin policat e sigurimit ishin prerë në emër të prokurorit. Ajo ngriti gjithashtu çështjen e burimeve financiare për blerjen nga vjehrra të një apartamenti prej 163.1 metrash katrorë në Tiranë, me çmim 114,170 euro.
Shumica vlerësoi se nuk kishte prova që ta lidhnin Çelën ose bashkëshorten e tij me apartamentin e vjehrrës dhe pranoi shpjegimet e dhëna për pasurinë e tyre.
Tri çështje u dërguan për inspektim
Një tjetër element i vendimit të vettingut ishte transferimi i tri çështjeve pranë organit kompetent për inspektim, me qëllim verifikimin nëse kishte shkaqe që mund të përbënin shkelje disiplinore ose të merreshin parasysh në vlerësimin periodik.
Pavarësisht diskutimeve, KPK vendosi me shumicë votash konfirmimin e tij në detyrë. Vendimi dhe mendimi i pakicës mbeten dokumente me rëndësi për të kuptuar arsyetimin dhe debatet që shoqëruan procesin e vettingut.
Heshtja publike dhe përgjegjësia institucionale
Në kushtet kur qytetarët janë të shqetësuar për përshkallëzimin e protestave, institucioni që heton veprat penale duhet të bëjë të qartë, brenda kufijve të ligjit, se çfarë mund të informojë publikun për veprimtarinë e tij.
A po hetohen të gjitha episodet e dhunës, pavarësisht nëse dyshimet lidhen me protestues apo punonjës të policisë? A po analizohen pamjet filmike? A po verifikohen pretendimet për përdorim të tepruar të forcës? Dhe çfarë informacioni mund të bëhet publik pa cenuar hetimet?
Këto janë çështje që lidhen me transparencën e institucionit dhe interesin e qytetarëve për të ditur nëse ligji zbatohet njësoj për të gjithë.
E Vërteta.al e ka kërkuar zyrtarisht këtë informacion nga Prokuroria e Tiranës që dje. Redaksia do të publikojë përgjigjen e institucionit sapo ta marrë, duke i dhënë hapësirë edhe qëndrimit të Arenc Çelës për pyetjet e ngritura në këtë shkrim.
Policia qëllon protestuesit edhe me plumba gome/ Ku është Prokuroria?
