Nga Ola Mitre
Kompania shtetërore e gazit, Albgaz ka realizuar një studim për mundësinë e zhvillimit dhe përhapjes së përdorimit të gazit natyror të lëngshëm (LNG), duke u fokusuar në ngritjen e kapaciteteve dhe për të justifikuar investimet në infrastrukturë. Ky studim ka përfshirë identifikimin e zonave kyçe që kanë një potencial të lartë për konsumimin e gazit dhe për të siguruar një kthim të justifikuar për kostot e ndërtimit të linjave të transmetimit të gazit natyror.
Studimi ka identifikuar 3 zona për konsum të lartë të gazit. E para është Rajoni i Vlorës, ku konsumatorët kryesorë do të jenë Termocentrali (TEC) i Vlorës, i cili është një përdorues i madh i energjisë, si dhe TEDA Vlorë dhe një grup klientësh industrialë dhe biznesesh të mesme dhe të vogla. Kjo zonë është vlerësuar si një mundësi investimi për zhvillimin e infrastrukturës së nevojshme për shpërndarjen e gazit natyror, me projekte tashmë të planifikuara për tërheqjen e investitorëve dhe zhvillimin e një rrjeti të fuqishëm të gazit.
Korça dhe partneriteti me SOCAR është zona e dytë, sipas studimit të realizuar. Ky projekt ka si qëllim të rrisë përdorimin e gazit natyror dhe të mbështesë zhvillimin ekonomik të rajonit, duke siguruar furnizim të qëndrueshëm dhe të sigurt me gaz për industrinë lokale dhe konsumatorët në këtë zonë.
Ndërkohë që, zona e tretë përfshin Durrësin dhe Tiranën, që vlerësohet se janë qendra të rëndësishme industriale dhe ekonomike e ku aktivitetet e biznesit dhe prodhimi janë zhvilluar me shpejtësi dhe kërkojnë furnizim të qëndrueshëm me energji. Zhvillimi i infrastrukturës përgjatë autostradës “Durrës-Tiranë” do të ndihmojë në lidhjen e këtyre dy qyteteve me rrjetin e shpërndarjes së gazit, duke e bërë më të lehtë për bizneset dhe industrinë lokale të aksesojnë burimet e gazit natyror dhe të ulë kostot e energjisë.
Studimi përmend edhe Elbasani, për shkak të industrisë së përpunimit të metaleve, si një nga sektorët kyç që kërkon sasi të mëdha energjie.
