Investimet efektive globale ranë me 11% në vitin 2024, duke shënuar vitin e dytë radhazi me rënie dhe duke shtuar frikën për një përkeqësim të mëtejshëm në vitin 2025. Paralajmërimi vjen nga Agjencia e Kombeve të Bashkuara për Tregti dhe Zhvillim (UNCTAD), e cila në raportin më të fundit thekson ndikimin e tensioneve gjeopolitike dhe fragmentimit tregtar në klimën e investimeve.
Sipas UNCTAD, transaksionet reale të Investimeve të Huaja Direkte (IHD) janë në rënie për shkak të pasigurisë në rritje që ka detyruar investitorët të përqendrohen te menaxhimi i rrezikut afatshkurtër, duke lënë pas dore projektet strategjike dhe afatgjata.
“Jemi shumë të shqetësuar për vitin 2025… tashmë shohim një ngadalësim të dukshëm të investimeve, ndërsa tarifat po dëmtojnë rritjen ekonomike,” deklaroi Sekretarja e Përgjithshme e UNCTAD, Rebeca Grynspan, në një intervistë për Reuters, duke e quajtur situatën një “helm për besimin e investitorëve”.
Në mënyrë paradoksale, kur përfshihen disa ekonomi evropiane transmetuese, të cilat funksionojnë si qendra kalimtare për kapitalin, IHD-të totale u rritën me 4% në 1.5 trilion dollarë. Por UNCTAD paralajmëron se kjo shifër është mashtruese, pasi një pjesë e madhe e këtyre fondeve nuk rezulton në investime produktive në terren.
Evropa shënoi rënien më të madhe, me 58% më pak investime, ndërsa Amerika e Veriut, e udhëhequr nga SHBA, përjetoi një rritje prej 23%. Ndërkohë, Azia Juglindore regjistroi nivelin e dytë më të lartë historik të IHD-ve, me 225 miliardë dollarë, një rritje prej 10%.
Pavarësisht kësaj, UNCTAD shpreh shqetësimin se në vendet në zhvillim, investimet nuk po shkojnë në sektorë kyç si infrastruktura, energjia dhe teknologjia, që janë jetikë për krijimin e vendeve të punës dhe zhvillimin e qëndrueshëm.
Raporti i OKB-së jep sinjale të forta për nevojën e stabilitetit ekonomik dhe politik, në mënyrë që kapitali ndërkombëtar të orientohet drejt projekteve që gjenerojnë zhvillim real dhe gjithëpërfshirës.
