Republikania e Dhomës së Përfaqësuesve të SHBA-së, Marjorie Taylor Greene, e cila dikur pretendonte se demokratët mund të “kontrollojnë motin”, ka njoftuar një projektligj federal që synon ndalimin e asaj që ajo e quajti “praktikë vdekjeprurëse” e gjeoinxhinierisë.
Ky veprim vjen pas stuhive shkatërruese të shiut dhe përmbytjeve të shpejta në Teksas që vranë të paktën 67 persona, përfshirë 15 fëmijë, me dhjetëra të tjerë ende të zhdukur që nga mbrëmja e së shtunës.
“Po paraqes një projektligj që ndalon injektimin, lëshimin ose shpërndarjen e kimikateve ose lëndëve në atmosferë me qëllimin e qartë të ndryshimit të motit, temperaturës, klimës ose intensitetit të dritës së diellit. Do jetë një vepër penale”, shkroi Greene në X.
“Kam bërë kërkime mbi modifikimin e motit dhe kam punuar me këshillin legjislativ për muaj të tërë, duke shkruar këtë projektligj”, shtoi ajo.
Greene tha se propozimi i saj pasqyron Projektligjin 56 të Senatit të Floridës, të nënshkruar në ligj nga guvernatori Ron DeSantis më 20 qershor.
Ligji i Floridës ndalon veprimtaritë e gjeoinxhinierisë dhe mbart dënime deri në pesë vjet burg dhe 100,000 dollarë gjoba. Gjithashtu kërkon raportim nga aeroportet publike dhe u lejon banorëve të paraqesin ankesa përmes një portali shtetëror.
“Duhet t’i japim fund praktikës së rrezikshme dhe vdekjeprurëse të modifikimit të motit dhe gjeoinxhinierisë”, tha Greene.
Ajo emëroi përfaqësuesin Tim Burchett si bashkëpropozues të projektligjit dhe kërkoi mbështetje nga të dyja partitë.
Greene bëri bujë vitin e kaluar kur pretendoi se demokratët mund të “kontrollojnë motin”, pas uraganit Helene, një stuhi e kategorisë 4 që la të paktën 227 të vdekur dhe detyroi më shumë se 5 milionë njerëz të zhvendoseshin.
Presidenti i atëhershëm Joe Biden i dënoi vërejtjet si “krejt qesharake” dhe “budallallëqe”, duke i quajtur ato një “promovim të pamatur, të papërgjegjshëm dhe të pamëshirshëm të dezinformimit dhe gënjeshtrave”.
