Prokuroria e Beratit ka dërguar për gjykim ish-drejtorin e Shërbimit Informativ të Shtetit në këtë qark,Aleksander Shulla, si dhe djalin e tij, Pandeli Shulla, të akuzuar për tre vepra të rënda penale.

Hetimet nisën pas zbulimit të një lokali në lagjen “30 Vjetori” të qytetit, ku sipas prokurorisë, në ambientet e administruara nga P.Sh., ushtroheshin lojëra fati online përmes kompjuterëve të lidhur me aplikacione të ngjashme me ato të kazinove.

Gjatë kontrollit në banesën e Aleksander Shulla, policia gjeti disa krëhëra me fishekë kalibri 7.62 mm dhe dy USB, ku rezultuan të kopjuara materiale të klasifikuara si “sekret shtetëror”, që administrohen në SHISH vetëm në kopje të vetme dhe nuk lejohet shumëfishimi i tyre.

Prokuroria thekson se ish-zyrtari kishte dorëzuar armatimin zyrtar në nëntor 2023, por kishte mbajtur municione pa leje në banesë, si dhe kishte ruajtur në mënyrë të paligjshme dokumente sekrete.

Në përfundim të hetimeve, organi i akuzës deklaroi se provat janë të mjaftueshme për t’i çuar të dy të pandehurit në gjykatë.

Pandeli Shulla do të përballet me akuzën e “Organizimit të lojërave të fatit” (neni 197/1 i Kodit Penal).

Aleksander Shulla, akuzohet për “Mbajtje pa leje të armëve dhe municionit” (neni 278/3) dhe “Tregim i sekretit shtetëror” (neni 294/1).

Njoftimi i Prokurorisë:

Ish-drejtori i Shërbimit Informativ të Shtetit në Berat, shtetasi A.Sh dhe djali i tij, P.Sh. janë marrë në hetim nga Prokuroria pranë Gjykatës së Shkallës së Parë të Juridiksionit të Përgjithshëm Berat për veprat penale ‘Organizimi ose ushtrimi i veprimtarive të lojrave të fatit në kundërshtim me ligjin’, ‘Mbajtja pa leje dhe prodhimi i armëve, armëve shpërthyese dhe i municionit’ dhe ‘Tregimi i sekretit shtetëror nga personi që i është besuar’ parashikuar nga nenet 197/1, 273/3 dhe 294/1 të Kodit Penal.

Sipas Prokurorisë pranë Gjykatës së Shkallës së Parë të Juridiksionit të Përgjithshëm, Berat, nga hetimet mbi procedimin penal nr.370 të vitit 2023, pas informacioneve se në një ambient në lagjen ’30 Vjetori’ në një lokal që drejtohej nga shtetasi P.Sh., po zhvilloheshin lojëra fati, u konstatuan kompjuterat e markave të ndryshme, të ndezura dhe në ekrane shfaqen lojrat online të ngjashme me ato të Adex Casino.

Nga verifikimi teknik, u provua se nëpërmjet një aplikacioni apo softëare të instaluar në këto paisje elektronike, duke u lidhur në internet, realizoheshin lojëra fati online.

Gjatë hetimeve, u ushtrua kontroll i banesës së shtetasit A.Sh., babait të tij, ku u konstatuan një krëhër metalik ngjyrë bronxi me 5 fishekë, të paplasur të kalibrit 7.62 mm, një çantë dore ngjyrë të zezë brenda të cilës u gjetën 3 krehër, të mbushur secili me nga 7 fishekë të kalibrit 7.62 mm dhe dy USB me mbishkrimet “Turbox” dhe “Kingston”.

Ky shtetas i cili ka ushtruar detyrën si Drejtor i Shërbimit Informativ Berat, shpjegoi se, në nëntor të vitit 2023 është larguar nga detyra dhe ka dorëzuar armatimin por ka harruar të dorëzojë municionin e gjetur në banesë nga shërbimet e policisë. Ai sqaroi se, fishekët e kalibrit 7.62 janë fishek të armëve të vjetra që i ka gjetur të godina e vjetër e ShIK-ut dhe i ka marrë si suvenir dhe i ka harruar në banesë.

Por nga verifikimet e kryera nga prokuroria rezultoi se armatimet ishin kthyer dhe kjo provohej edhe nga fletëhyrja që ndodhet në institucion. Ndërkohë që nga verifikimet e kryera rezultoi se, dy nga materialet e ndodhura në Usb-në me emërtimin “Usb drive” janë të klasifikuara në nivelin “sekret” dhe administrohen në SHISH në kopje të vetme. Kopjimi ose shumëfishimi i tyre është i ndaluar dhe në kundërshtim me aktet që normojnë punën e SHISH.

Marrja e këtyre materialeve në kundërshtim me rregullat e sigurisë së informacionit të klasifikuar, që ka rezultuar me ekspozimin e pjesshëm ose tërësor, në mënyrë të paautorizuar, përbën shkelje të sigurisë së informacionit të klasifikuar.

Në përfundim të hetimeve paraprake, pas analizës në tërësi të të dhënave dhe provave të marra, vijmë në përfundimin se, ka të prova të mjaftueshme se të pandehurit P.Sh dhe A.Sh. kanë kryer veprat penale për të cilat akuzohen. Rezulton përfundimisht e provuar se i pandehuri A. Sh. ka qenë me detyrë punonjës i Shërbimit Informativ të Shtetit dhe ka kopjuar materiale që, sipas ligjit të njohur publikisht, përbëjnë sekret shtetëror, dhe i janë besuar për shkak të detyrës.

Marrja e këtyre materialeve në kundërshtim me rregullat e sigurisë së informacionit të klasifikuar, dhe përhapja e tyre në dy Usb brenda në banesën e të pandehurit, kur ai nuk ushtronte më as detyrën e punonjësit të shërbimit informativ të shtetit, që ka rezultuar me ekspozimin e pjesshëm ose tërësor, në mënyrë të paautorizuar, përbën shkelje të sigurisë së informacionit të klasifikuar.

Sa më sipër, u çmua se ka prova të mjaftueshme në mbështetje të akuzës për faktin penal të “Organizimi ose ushtrimi i veprimtarive të lojrave të fatit në kundërshtim me ligjin”, të parashikuar nga neni 197/1 i Kodit Penal, duke e konsideruar akuzën në ngarkim të të pandehurit P. Sh.

Po kështu u provua dhe ka prova të mjaftueshme në mbështetje të akuzës për faktet penale “Mbajtja pa leje dhe prodhimi i armëve, armëve shpërthyese dhe i municionit” dhe “Tregimi i sekretit shtetëror nga personi që i është besuar” të parashikuar nga nenet 278/3 dhe 294/1 të Kodit Penal, duke e konsideruar akuzën në ngarkim të të pandehurit A.Sh. plotësisht të provuar, në zbatim të nenit 331 të Kodit të Procedurës Penale.