Ish-kryeministri dhe kryetari i Partisë Demokratike, Sali Berisha, iu përgjigj delegacionit të Parlamentit Europian që akuzoi se mbështetja e tij për MAGA dhe Donald Trump e bën atë “jo pro-perëndimor”.

Berisha theksoi se programi i Trump është konservator dhe i qendrës së djathtë, duke nënvizuar se nuk ka asgjë antiperëndimore në të. Ai shtoi se partia e tij ka qenë gjithmonë pro-perëndimore dhe pro-çështjes shqiptare, që nga vitet ’90, dhe ka kontribuar në vendosjen e çështjes shqiptare si çështje botërore.

Ish-kryeministri kritikoi gjithashtu qeverinë Rama dhe ligjet e fundit, duke i cilësuar si përmbysje të drejtësisë dhe kufizim të lirive. Ai tha se censura dhe mbështetja për narkoshtetin janë pjesë e një platforme që shkatërron vendin dhe detyron largimin e shqiptarëve nga Shqipëria.

Berisha garantoi se PD dhe ai vetë do të qëndrojnë të palëkundur në mbrojtje të demokracisë, votës së lirë dhe fjalës së lirë, pavarësisht çmimit politik.