Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Protesta e studentëve dhe qytetarëve në Tiranë është përshkallëzuar gjatë pasdites së 14 tetorit, me përplasje të përsëritura me policinë dhe lëvizjen e protestuesve në disa zona të kryeqytetit. Nga zona e Ministrisë së Arsimit, tensionet u zhvendosën drejt Ministrisë së Financave, Kryeministrisë, Piramidës dhe institucioneve të tjera në qendër të Tiranës.
Policia ka përdorur gaz lotsjellës dhe autobotë me ujë për të shpërndarë turmat, ndërsa protestuesit kanë vijuar qëndrimin në rrugë, kanë ngritur barriera me kosha të djegur dhe kanë hedhur sende drejt forcave të rendit.
Protestuesit në disa pika të kryeqytetit
Gjatë pasdites, protesta nuk u përqendrua më vetëm përpara Ministrisë së Arsimit. Rreth orës 17:37, grupe protestuesish u pozicionuan pranë Kryeministrisë dhe Piramidës, ndërsa një pjesë e tyre u zhvendosën drejt Ministrisë së Financave dhe Komisionit Qendror të Zgjedhjeve.
Në ambientet e Ministrisë së Financave raportohet se protestuesit kanë hyrë dhe kanë nxjerrë disa sende, disa prej të cilave u dogjën. Ndërkohë, në bulevard, policia vijoi përdorimin e gazit lotsjellës në përpjekje për të shpërndarë turmën.
Zjarr dhe dëmtime në institucione e biznese
Protesta është shoqëruar me dëmtime të pronës publike dhe private. Gjatë përplasjeve, protestuesit kanë djegur kosha mbeturinash dhe sende të nxjerra nga ambiente institucionale. Raportime të tjera flasin për zjarr në godinën e Ministrisë së Arsimit dhe dëmtime në një degë banke.
Përplasjet vijnë pas incidenteve të një dite më parë, kur u dëmtuan edhe ambiente të Bashkisë së Tiranës dhe subjekte private.
Pse po protestojnë studentët?
Protesta nisi me kërkesat për përmirësimin e kushteve në universitete, uljen e kostove të arsimit të lartë, më shumë mbështetje financiare për studentët dhe perspektiva më të mira punësimi pas diplomimit.
Gjatë zhvillimeve, kërkesat u ndërthurën me thirrjet kundër qeverisë dhe kërkesën për dorëheqjen e kryeministrit Edi Rama. Lëvizja ka marrë edhe përmasa më të gjera politike, ndërsa disa protestues kanë shprehur pakënaqësi edhe ndaj opozitës.
