Seanca paraprake për Erion Veliajn dhe të pandehurit e lidhur me të u shty për më 2 dhjetor, ora 09:00, pas kërkesës së avokatëve për t’u njohur më mirë me aktet e dosjes.

Veliaj akuzohet për korrupsion aktiv dhe pasiv, shpërdorim detyre dhe ndikim të paligjshëm në prokurime publike, brenda një çështjeje që lidhet me përfitime financiare të dyshuara dhe favorizim kompanish në tendera dhe kontrata shtetërore. Sipas SPAK, veprimet e Veliajt mund të kenë shkaktuar dëme ekonomike për buxhetin e shtetit dhe për pasurinë publike.

Gjatë seancës, avokatët kërkuan gjithashtu që klienti i tyre të ketë mundësinë të lexojë materialet hetimore në qelinë e burgut, por gjykata ende nuk ka marrë vendim mbi këtë kërkesë.

Prokurori i SPAK, reagoi duke theksuar se Veliajt i është dhënë mundësia të njohë aktet dhe se nuk mund të kërkohet shtyrje për të gjykuar në këtë mënyrë:

“Jeni njohur me aktet, kërkoni të gjykoheni dhe nuk vini në gjykim,” deklaroi prokurori.

Seanca e radhës pritet të zhvillohet më 2 dhjetor, ku do të shqyrtohen kërkesat e avokatëve dhe do të vijojë procesi gjyqësor. Gjykata gjithashtu do të vendosë mbi përdorimin e një laptopi për leximin e materialeve hetimore në burg, një kërkesë që avokatët e Veliajt e konsiderojnë të nevojshme për përgatitjen e mbrojtjes.

Akuzat

Veliaj akuzohet për një sërë veprash penale, duke përfshirë:

Korrupsion aktiv dhe pasiv, ndikim dhe përfitim i padrejtë në prokurime publike.

Shpërdorim detyre, përdorim i pozicionit zyrtar për përfitime personale dhe favore për kompani private.

Ndikim të paligjshëm në tendera dhe kontrata shtetërore, favorizim të subjekteve të caktuara në kurriz të interesit publik.
Sipas SPAK, veprimet e Veliajt mund të kenë shkaktuar dëme ekonomike për buxhetin e shtetit dhe pasurinë publike.