Presidenti i SHBA-së, Donald Trump shprehet optimist për bisedimet që po zhvillohen mbi planin e paqes të propozuar nga ai për t’i dhënë fund luftës në Ukrainë.

Nga bordi i Air Force One, ndërsa udhëtonte nga Uashingtoni për në Florida, Trump theksoi se 28 pikat e hartuara janë vetëm një “hartë” dhe jo një plan paqeje i finalizuar. Sipas tij, administrata po bën përparim drejt një zgjidhjeje.

“E tëra ishte një hartë. Nuk ishte një plan. Ishte një koncept. Ata i kanë marrë 28 pikat, dhe pastaj u reduktuan në 22 pika. Shumë prej tyre i zgjidhëm, dhe në fakt i zgjidhëm shumë mirë. Do të shohim çfarë do të ndodhë. Po zhvillojmë bisedime të mira… Po zhvillojmë disa bisedime me Rusinë. Ukraina po ecën mirë. Mendoj se janë mjaft të lumtur për këtë. Do të doja ta shihja të mbaronte, po bëjmë përparim.”, u shpreh ai.

I pyetur për lëshimet që Rusia do të duhej të bënte, Trump tha se Moska tashmë po ofronte “lëshime të mëdha”. Më pas shtoi se Evropa do të jetë e përfshirë në garancitë e sigurisë. “Evropa dëshiron vërtet ta shohë të përfunduar (luftën) sa më shpejt të jetë e mundur”, tha ai.

I pyetur për një afat kohor, ai u përgjigj: “Afati kohor për mua është kur të mbarojë… Të gjithë janë lodhur duke u grindur.” Trump tha se i dërguari i tij, Steve Witkoff, do të takohet me Presidentin rus Vladimir Putin javën e ardhshme në Moskë, duke shtuar se mund të shoqërohet edhe nga dhëndri i tij, Jared Kushner.

Takimi është konfirmuar edhe nga Yuri Ushakov, këshilltari diplomatik i Vladimir Putinit, i cili tha se është arritur një marrëveshje me Shtetet e Bashkuara për një vizitë të të dërguarit të posaçëm të SHBA-së, Steve Witkoff, në Moskë javën e ardhshme.