Kontratat e partneritetit publik-privat do të rregullohen nga një ligj i ri, i cili hyn në fuqi më 28 janar dhe është botuar në Fletoren Zyrtare. Ligji heq konceptin e dhënies në përdorim të pasurive publike me vlerë simbolike 1 euro dhe vendos rregulla të qarta për planifikimin, administrimin dhe mbikëqyrjen e kontratave.
Sipas ligjit të ri, për çdo koncesion duhet të jetë bërë një studim fizibiliteti i miratuar edhe nga Ministria e Financave, ku analizohen kostot, përfitimet dhe risku për buxhetin e shtetit. Bashkitë nuk lejohet të firmosin kontrata afatgjata pa kapacitete financiare, ndërsa çdo institucion do të ketë njësitë e veta të monitorimit në kohë reale.
Ligji parashikon gjithashtu funksionalizimin e plotë të Regjistrit Elektronik të Koncesioneve, ku do të publikohen dokumentet e procedurave dhe garancitë që kërkohen nga ofertuesit. Sigurimi i kontratave do të jetë deri në 5% të vlerës së kontratës, duke garantuar mbrojtje ndaj dështimeve të koncesionarëve ose partnerëve privatë.
Afati i kontratave do të përcaktohet në bazë të punëve ose shërbimeve të kërkuara, duke mos tejkaluar kohën e arsyeshme për rikuperimin e investimeve. Nënkontraktimi nuk mund të kalojë 50% të vlerës së përgjithshme të kontratës, ndërsa autoriteti kontraktues mund të ndërpresë kontratën në rast paaftësie paguese ose shkeljesh serioze.
Risitë kryesore të ligjit:
Analizë fizibiliteti teknik dhe financiar përpara miratimit të projektit.
Miratim ex-ante nga Ministria e Financave për çdo projekt me ndikim financiar.
Njësitë vendore nuk mund të hyjnë në kontrata afatgjata pa kapacitete financiare.
Krijimi i njësive të posaçme për monitorimin e kontratave në kohë reale.
Funksionalizimi i Regjistrit Elektronik të Koncesioneve.
Garanci deri në 5% të vlerës së kontratës për sigurimin e realizimit të projektit.
Ligji synon të forcojë transparencën, proporcionalitetin dhe sigurinë juridike në dhënien e koncesioneve dhe partneriteteve publike-private në Shqipëri.
