Kryebashkiaku i arrestuar i Tiranës, Erion Veliaj, ka paguar rreth 220 mijë dollarë (rreth 220 milionë lekë të vjetra) në Shtetet e Bashkuara për të lobuar kundër prokurorit të SPAK, Ols Dado, gjyqtarit të posaçëm Erion Bani dhe vetë Prokurorisë së Posaçme.
Një fragment dokumenti në gjuhën angleze, i rrjedhur në media, tregon përpjekjet e Veliajt për të denigruar figurat e prokurorit dhe gjyqtarit, duke i lidhur ata me Partinë Demokratike, dhe duke e akuzuar SPAK-un se ka diktuar caktimin e gjyqtarit nga GJKKO.
Sipas dokumentit, Veliaj pretendon se Ols Dado është në konflikt interesi, pasi është anëtar aktiv i Partisë Demokratike dhe zhvillues pronash në Tiranë, duke u përpjekur të implikojë politikisht hetimin që çoi në arrestimin e tij. Dokumenti sqaron gjithashtu se nuk ka prova për shkelje ligjore nga prokurori në procesin e miratimit apo refuzimit të lejeve të ndërtimit, ndërsa Veliaj është i vetmi nën hetim që ndodhet në paraburgim.
Fragmente të dokumentit sugjerojnë gjithashtu se gjyqtari i SPAK, Erion Bani, i cili ka marrë çështjen, ka lidhje të njohura me Partinë Demokratike, sipas pretendimeve të lobimit të Veliajt.
