Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Partia Demokratike vijon të ndjekë të njëjtën strategji në Kuvend, me bllokimin e foltores, përplasjen e tavolinave dhe ndërprerjen e fjalës së deputetëve socialistë. Ndërsa seancat parlamentare kthehen në përplasje politike, nenet vijojnë të miratohen mes kaosit.
Edhe sot, kur në Kuvend pritej të zhvillohej interpelanca me ministrin e Brendshëm, Ervin Demo për dhunën gjatë protestave, opozita zgjodhi të bllokojë foltoren dhe të përplasë tavolinat, duke e zhvendosur vëmendjen nga përballja me ministrin te përplasja brenda sallës së Parlamentit.
Në një moment kur pritej që dhuna në protesta të diskutohej mbi bazën e fakteve, provave dhe përgjegjësive institucionale, debati u shoqërua sërish me tensione dhe bllokim të punimeve. Në vend që ministrit t’i kërkohej llogari për mënyrën se si policia ka vepruar gjatë protestave, skena politike u dominua nga përplasjet mes deputetëve.
Kjo strategji nuk është e re për PD-në. Bllokimi i foltores, fikja e mikrofonave të socialistëve dhe përplasjet fizike me mobiliet e sallës janë kthyer në një skenar të përsëritur, ndërsa Kuvendi vijon punën dhe miraton nene e ndryshime ligjore në një klimë ku është e vështirë të ndiqet përmbajtja e debatit.
Ndërsa kamerat fokusohen te kaosi dhe përplasjet, qytetarët mbeten pa një debat të qartë mbi përmbajtjen e ligjeve që miratohen dhe pasojat që ato mund të kenë. Zhurma në sallë mund të tërheqë vëmendjen, por nuk zëvendëson transparencën, argumentet dhe llogaridhënien.
Në rastin e protestave, pyetja që shtrohet është nëse opozita po përdor të gjitha mundësitë parlamentare për të zbardhur veprimet e policisë dhe për të kërkuar përgjegjësi për çdo rast dhune, apo nëse përplasjet në Kuvend po e lënë sërish këtë çështje në hije. Të jesh në krah të protestuesve nuk mjafton të deklarohet politikisht, kërkon edhe prova, dokumentim të rasteve konkrete dhe presion institucional për të nxjerrë përgjegjësitë.
Edhe reagimi i ish-deputetes demokrate Flutura Açka, e cila i cilësoi zhvillimet në PD si “teatër”, rikthen në vëmendje debatet për efektivitetin e kësaj strategjie opozitare. Në reagimin e saj, Açka akuzoi drejtuesit e partisë se kanë shkatërruar shansin historik të demokratëve për të ardhur në pushtet dhe vuri në pikëpyetje moralin e tyre politik.
Sepse, ndërsa foltorja bllokohet dhe mikrofonat fiken, qeveria vijon të qeverisë dhe Kuvendi vijon të votojë. Për qytetarët, përplasjet mund të jenë spektakël politik, por llogaridhënia për dhunën në protesta dhe transparenca mbi ligjet e miratuara mbeten çështjet që kërkojnë përgjigje konkrete.
Açka akuzon drejtuesit e PD-së/ “Protesta është teatër, demokratët i çuat pas diellit”
