Departamenti i Shtetit i Shteteve të Bashkuara ka vendosur të pezullojë përpunimin e vizave të emigrantëve për Shqipërinë dhe rreth 75 vende të tjera, në kuadër të një rishikimi të gjerë të procedurave të verifikimit të aplikantëve.

Sipas një memoje të brendshme të Departamentit të Shtetit, e siguruar nga Fox News, zyrtarët konsullorë janë udhëzuar që të refuzojnë aplikimet për viza në bazë të ligjit ekzistues, ndërsa po kryhet rivlerësimi i standardeve të shqyrtimit. Masa synon të ndalojë hyrjen në SHBA të personave që mund të konsiderohen “barrë publike”.

Pezullimi do të hyjë në fuqi më 21 janar dhe do të mbetet në zbatim për një afat të pacaktuar, deri në përfundimin e procesit të rishikimit.

Përveç Shqipërisë, lista e vendeve të prekura përfshin edhe Somalinë, Rusinë, Afganistanin, Brazilin, Iranin, Irakun, Egjiptin, Nigerinë, Tajlandën dhe Jemenin, ndër të tjera.

Sipas raportimit të Fox News, që në nëntor 2025 Departamenti i Shtetit kishte dërguar një kabllogram në të gjitha misionet diplomatike amerikane, duke kërkuar zbatimin e masave më të rrepta të shqyrtimit në bazë të dispozitës së “barrës publike” të ligjit amerikan të emigracionit.

Në vlerësimin e aplikantëve, zyrtarët konsullorë do të marrin parasysh disa faktorë, përfshirë gjendjen shëndetësore, moshën, aftësinë për të komunikuar në gjuhën angleze, situatën financiare dhe nevojën e mundshme për trajtim mjekësor afatgjatë. Personat që janë në moshë të avancuar, kanë probleme shëndetësore, kanë marrë më parë ndihmë financiare nga shteti apo kanë pasur shtrime të shpeshta në spital, mund të përballen me refuzim të vizës.

Autoritetet amerikane nuk kanë dhënë ende një afat se kur procesi normal i përpunimit të vizave do të rifillojë.