Kryetari i Bashkisë së Tiranës, Erion Veliaj, ka depozituar sot një kallëzim penal pranë Prokurorisë së Juridiksionit të Përgjithshëm në Tiranë, për veprën penale të “Falsifikimit të dokumenteve”, parashikuar nga neni 186 i Kodit Penal.

Sipas kallëzimit, dokumenti i administruar në dosjen e Gjykatës së Posaçme të Apelit për Korrupsionin dhe Krimin e Organizuar, përmban një nënshkrim në emër të Veliajt, sikur ai të kishte marrë dijeni personalisht për një vendim gjyqësor. Veliaj sqaron se nënshkrimi nuk është i tij, ndërsa vendimi i Apelit nuk ka mbërritur kurrë në Institucionin e Ekzekutimit të Vendimeve Penale Durrës, ku ai ndodhet i paraburgosur. Ky fakt është konfirmuar zyrtarisht nga I.E.V.P. Durrës.

Në kallëzim theksohet se mungesa e njoftimit real dhe përdorimi i një dëftese me nënshkrim të rremë përbëjnë provë të drejtpërdrejtë të falsifikimit, me qëllim aktivizimin fiktiv të afateve për ushtrimin e rekursit në Gjykatën e Lartë. Veliaj shton se ky veprim cenon të drejtën kushtetuese për ankim, sigurinë juridike dhe parimin e procesit të rregullt ligjor.

Në kallëzim kërkohen:

Regjistrimi i menjëhershëm i procedimit penal

Ekspertim grafik i nënshkrimit

Hetimi i zinxhirit të plotë të personave që kanë hartuar, administruar apo përdorur dokumentin

Hetimi i çdo vepre tjetër penale që mund të rezultojë gjatë hetimit, përfshirë shpërdorimin e detyrës

Një kopje e kallëzimit i është dorëzuar edhe Gjykatës së Lartë, për të konfirmuar se afatet për ushtrimin e rekursit nuk kanë filluar ligjërisht për shkak të mungesës së njoftimit të vlefshëm.

Ky kallëzim shënon hapin zyrtar të Veliajt për të kërkuar përgjegjësi ligjore për përdorimin e një dokumenti zyrtar të rremë në një proces gjyqësor të rëndësishëm.