Dobësimi i vazhdueshëm i dollarit amerikan, i cili ka humbur rreth 10% të vlerës gjatë vitit 2025 dhe 2,6% të tjera që nga fillimi i vitit 2026, po ndikon drejtpërdrejt në ekonominë europiane. Monedha e përbashkët, euro, është forcuar ndjeshëm ndaj dollarit, duke arritur nivelin 1,20 dollarë për herë të parë që nga viti 2021.
Sipas analistëve, një nga arsyet kryesore të rënies së dollarit është pasiguria e investitorëve për shkak të politikave të paparashikueshme të presidentit amerikan Donald Trump. Megjithatë, disa ekspertë mendojnë se dobësimi i dollarit mund të jetë i qëllimshëm, pasi një monedhë më e lirë e bën eksportet amerikane më konkurruese. Vetë Trump ka deklaruar se nuk shqetësohet për një dollar të dobët, duke e konsideruar këtë situatë pozitive.
Forcimi i euros ka pasoja të përziera për eurozonën. Nga njëra anë, importet bëhen më të lira, duke ulur çmimet për konsumatorët europianë. Nga ana tjetër, eksportet e Bashkimit Europian humbasin konkurrueshmërinë, gjë që mund të dëmtojë prodhuesit dhe rritjen ekonomike. Sipas ekspertëve, nëse kursi euro-dollar mbetet në nivelin 1,20, rritja ekonomike e eurozonës mund të jetë rreth 0,2 për qind më e ulët këtë vit, krahasuar me një kurs më të favorshëm prej 1,16 dollarësh.
Situata prek veçanërisht sipërmarrjet europiane që eksportojnë në SHBA, të cilat rrezikojnë të përballen me humbje të konkurrueshmërisë. Kjo ka nxitur debat mbi rolin e Bankës Qendrore Europiane (BQE). Disa zyrtarë e konsiderojnë forcimin e euros si të moderuar dhe jo alarmant, por nëse trendi vazhdon, BQE mund të shqyrtojë uljen e normave të interesit për të frenuar rritjen e mëtejshme të monedhës së përbashkët.
