Monika Kryemadhi deklaroi në emisionin “Breaking” me Fiori Dardhën në Top News se Partia e Lirisë po shkon drejt shuarjes, duke shprehur keqardhjen për situatën ku ndodhet forca politike që ajo thotë se ka ndërtuar prej vitesh.
Sipas Kryemadhit, kjo situatë është pasojë e një procesi të qëllimshëm kriminalizimi të Partisë së Lirisë, ku sipas saj janë përfshirë edhe anëtarë të familjes së saj. Ajo theksoi se investimi i saj personal dhe familjar në këtë parti ka qenë i plotë, ndërsa sot, sipas saj, nëna dhe bashkëshorti i saj ndodhen përballë drejtësisë si pjesë e këtij procesi.
“Partia e Lirisë ishte një risi në politikën shqiptare, një parti që kërkonte aleanca, por sot po kriminalizohet qëllimisht”, u shpreh Kryemadhi.
Duke folur për gjendjen e drejtësisë dhe politikës në vend, ajo deklaroi se një pjesë e madhe e të burgosurve ndodhen në paraburgim, duke e cilësuar situatën si shqetësuese.
“Sot kemi 80% të të burgosurve në paraburgim. Sot jemi Republika e SPAK-ut”, tha ajo.
E pyetur mbi mundësinë që opozita të kthehet në një alternativë qeverisëse, Kryemadhi theksoi se problemi kryesor lidhet me mungesën e metodologjisë dhe konsistencës në veprimet politike.
Ajo hodhi akuza të forta edhe lidhur me arrestimin e Ilir Metës, duke e cilësuar atë si rezultat të një marrëveshjeje mes dy partive të mëdha politike për të vijuar, sipas saj, aferat e tyre.
“Burgosja e Metës është marrëveshje e dy partive të mëdha për të vazhduar aferat”, deklaroi Kryemadhi.
Kryemadhi pranoi se si ajo ashtu edhe Ilir Meta kanë bërë gabime gjatë angazhimit të tyre politik, por theksoi se këto gabime, sipas saj, lidhen me tejkalimin e kufijve në ndihmë të qytetarëve.
Ajo solli si shembull ndërhyrjet për raste urgjente shëndetësore, të cilat sipas saj sot interpretohen nga SPAK si shpërdorim detyre.
Në fund, Kryemadhi kritikoi ashpër mediat dhe klasën politike për heshtjen, sipas saj, ndaj kushteve dhe mënyrës së burgosjes së Ilir Metës, duke theksuar se për tetë muaj ai është lënë në harresë.
“Asnjë emision, asnjë gazetar dhe asnjë deputet i Partisë së Lirisë nuk foli për shkeljet e rregullave të burgosjes së Metës. Ai u harrua në burg për tetë muaj”, u shpreh ajo.
