Udhëheqësit evropianë kanë akuzuar Hungarinë për sabotim të përpjekjeve për të forcuar mbështetjen ndaj Ukrainës, pasi qeveria e kryeministrit Viktor Orbán bllokoi masat e reja ekonomike kundër Rusisë në prag të përvjetorit të katërt të pushtimit.
Sipas zyrtarëve evropianë, Gjermania, Franca dhe vende të tjera të Bashkimit Evropian nuk arritën të bindnin Budapestin që të miratonte paketën e fundit të sanksioneve dhe një kredi të re për të ndihmuar Ukraina në përmbushjen e nevojave ushtarake dhe financiare. Kryeministri i Polonisë, Donald Tusk, i përshkroi veprimet e Hungarisë si “sabotim politik”.
Debati rrezikon të zbehë shfaqjen e solidaritetit mes presidentit ukrainas Volodymyr Zelensky dhe partnerëve të tij evropianë. Politikanë të lartë pritet të vizitojnë Kievi këtë javë, përfshirë sekretaren e brendshme britanike Yvette Cooper dhe presidenten e Komisionit Evropian Ursula von der Leyen.
Kryeministri britanik Keir Starmer deklaroi se, pavarësisht zhvillimeve të shumta globale, lufta në Ukrainë mbetet çështja më kritike e kohës sonë. “Ajo ngre pyetjen nëse liria ukrainase dhe evropiane do të zgjasë. Përgjigjja jonë është e qartë: Rusia nuk po e fiton këtë luftë dhe nuk do ta fitojë,” tha ai, duke shtuar se Mbretëria e Bashkuar do të qëndrojë në krah të Ukrainës deri në arritjen e një paqeje të drejtë dhe të qëndrueshme.
Përvjetori i pushtimit vjen pas një dimri të ashpër, gjatë të cilit Rusia ka sulmuar sistematikisht infrastrukturën energjetike të Ukrainës me dronë dhe raketa balistike, duke lënë miliona njerëz pa energji elektrike. Qytete si Odesa dhe Kharkiv janë goditur rëndë, raportoi The Guardian.
Ndërkohë, një raund i ri bisedimesh për paqe pritet të zhvillohet në Gjeneva më vonë këtë javë, sipas Kyrylo Budanov, kreu i zyrës së presidentit ukrainas. Ai pranoi se negociatat me Rusinë, të ndërmjetësuara nga Shtetet e Bashkuara, “nuk po shkojnë mirë”, megjithëse shtoi se ka përparim gradual.
Deri tani, Kremlini ka refuzuar të zbusë kërkesat e tij fillestare, duke kërkuar që Ukraina të dorëzojë të gjithë rajonin e Donbasit, përfshirë zonat që Rusia nuk i kontrollon. Presidenti Zelensky e ka përjashtuar këtë mundësi, pavarësisht presionit nga të dërguarit e Donald Trump për të arritur një marrëveshje.
