Kryeministri Edi Rama ka deklaruar se Shqipëria ka hyrë në një fazë të re zhvillimi ekonomik, ku nuk shihet më si një premtim për të ardhmen, por si një vend me mundësi konkrete investimi.

Gjatë fjalës së tij në edicionin e dytë të MatchMaker Albania, Rama theksoi se vendi tashmë reflekton ritmin e zhvillimit global dhe po shndërrohet në një hapësirë reale për sipërmarrje dhe investime.

“Shqipëria nuk është më një tokë e premtuar për një të nesërme më të mirë, por një vend ku duhet parë dhe ku mund të ndërtohen ekosisteme që i përgjigjen nevojave të sipërmarrësve,” u shpreh ai.

Kryeministri shpjegoi se platforma MatchMaker Albania ka lindur si një histori suksesi që bashkon investitorë, kompani dhe institucione, duke krijuar ura konkrete bashkëpunimi ekonomik dhe duke nxitur kthimin e investitorëve në vend.

Në fjalën e tij, Rama identifikoi katër sektorë kyç që, sipas tij, përfaqësojnë transformimin e modelit ekonomik shqiptar:

Turizmi, ku ai theksoi rritjen e investimeve të mëdha dhe zhvillimin e projekteve moderne urbane, me synim një profil të ri turistik për vendin.

Bujqësia inteligjente, ku produktet shqiptare po fitojnë tregje ndërkombëtare dhe po eksportohen në mbi 100 vende të botës.

Teknologjia dhe digjitalizimi, të cilat Rama i cilësoi si një mundësi unike për të kapërcyer hendekët historikë të zhvillimit.

Energjia, një sektor në transformim përmes diversifikimit dhe inovacionit, me objektivin për të arritur sovranitet të plotë energjetik.

Sipas kryeministrit, këto fusha përbëjnë bazën e një ekonomie të re, më konkurruese dhe më të integruar në tregjet globale, duke rritur potencialin e Shqipërisë si një destinacion tërheqës për investitorët e huaj dhe vendas.