Bordi i Transparencës ka vendosur çmimet e reja të hidrokarbureve në vend, duke reflektuar një ulje të ndjeshme të tyre në tregun vendas. Vendimi është marrë në mbledhjen e zhvilluar më 9 prill 2026 dhe ka hyrë në fuqi që nga ora 14:30 e së njëjtës ditë.

Sipas këtij vendimi, çmimi i shitjes me pakicë për naftën (gazoil) është caktuar në jo më shumë se 210 lekë për litër, duke shënuar një ulje prej 10 lekësh krahasuar me nivelin e mëparshëm. Ndërkohë, çmimi me shumicë për këtë nënprodukt nuk duhet të kalojë 198 lekë për litër.

Edhe benzina ka pësuar rënie çmimi. Ajo do të tregtohet me pakicë në jo më shumë se 173 lekë për litër, një ulje prej 8 lekësh, ndërsa çmimi me shumicë është përcaktuar në jo më shumë se 161 lekë për litër.

Në njoftimin zyrtar, Bordi thekson se këto çmime do të jenë të vlefshme deri në mbledhjen e ardhshme, ku do të reflektohen ndryshimet e reja të mundshme në tregjet ndërkombëtare.

Autoritetet u kanë bërë thirrje të gjithë operatorëve të tregtimit të karburanteve, si me shumicë ashtu edhe me pakicë, që të zbatojnë me përpikëri vendimin e marrë. Në rast të shkeljeve, paralajmërohet pezullimi i aktivitetit për subjektet që nuk respektojnë çmimet e përcaktuara.

Ministria e Ekonomisë dhe Inovacionit, në bashkëpunim me Ministrinë e Financave dhe Ministrinë e Infrastrukturës dhe Energjisë, kanë theksuar angazhimin për mbrojtjen e interesave të konsumatorëve dhe garantimin e konkurrencës së ndershme në treg.

Në një sqarim shtesë, bëhet e ditur se bazuar në Aktin Normativ nr. 1, datë 3 prill 2026, niveli i akcizës reduktohet në 80% vetëm në rastet kur çmimi i naftës kalon 220 lekë/litër ose ai i benzinës kalon 200 lekë/litër. Duke qenë se çmimet aktuale janë nën këto kufij, akciza do të vijojë të zbatohet në nivelin e plotë, 100%.

Ulja e çmimeve vjen në një moment të ndjeshëm për tregun e karburanteve, duke ofruar një lehtësim të përkohshëm për qytetarët dhe bizneset, të cilët janë përballur me luhatje të vazhdueshme të çmimeve në muajt e fundit.