Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Aktivistja shqiptare Evi Kokalari ka reaguar pas zhvillimeve politike në Hungari, ku humbja e kryeministrit Viktor Orbán pas 16 vitesh u pasua nga fitorja e opozitës së udhëhequr nga Péter Magyar.
Përmes një postimi në rrjetin social Facebook, Kokalari ka deklaruar se vetëm ajo mund të fitojë përballë ish-kryeministrit Sali Berisha në garën e ardhshme për drejtimin e Partisë Demokratike, duke theksuar se ka denoncuar vazhdimisht, sipas saj, korrupsionin brenda opozitës.
“Ju garantoj: vetëm unë mund të fitoj kundër Sali Berisha dhe Edi Rama,” ka shkruar ajo, duke shtuar se nuk ka kursyer askënd kur bëhet fjalë për ekspozimin e korrupsionit, përfshirë edhe persona me të cilët ka pasur më parë marrëdhënie.
Në deklaratat e saj, Kokalari ka përmendur edhe situatën në Hungari, duke e krahasuar me politikën shqiptare dhe duke theksuar se edhe një lider i mbështetur ndërkombëtarisht si Orbán, sipas saj, mund të humbasë zgjedhjet.
Ajo ka akuzuar gjithashtu ish-kryeministrin Sali Berisha për mbajtje peng të Partisë Demokratike dhe ka pretenduar se brenda partisë nuk po lejohet ndryshimi real politik.
Deklaratat e saj kanë shkaktuar reagime në rrjetet sociale, duke u bërë pjesë e debatit politik brenda opozitës shqiptare.
