Ish-deputeti i Partisë Socialiste, Spartak Braho, ka reaguar me tone të forta ndaj kryeministrit Edi Rama, pas deklaratave të këtij të fundit gjatë homazheve për ish-kryeparlamentarin Servet Pëllumbi.

Në një intervistë televizive, Braho e ka cilësuar të papërshtatshme dhe “skandaloze” mënyrën se si Rama iu referua Pëllumbit, duke e përshkruar atë si “marksist-leninist” dhe konservator gjatë fjalës së mbajtur në homazhe.

Sipas Brahos, një deklaratë e tillë nuk duhej bërë në një ditë homazhi, duke e quajtur atë cinike dhe mungesë respekti ndaj figurës së ndjerë.

“E turpshme. Një akuzë të tillë nuk mund t’ia thuash Servet Pëllumbit. Përdorimi i kësaj fraze ishte një cinizëm i madh”, është shprehur ai.

Ish-deputeti socialist ka vijuar kritikat edhe për Partinë Socialiste, duke deklaruar se ajo po humbet identitetin e saj politik dhe nuk përfaqëson më shtresat e varfra dhe të mesme të shoqërisë.

Sipas Brahos, PS është kthyer në një forcë që i shërben interesave të ngushta dhe oligarkëve, duke paralajmëruar madje një “shkërmoqje” të saj në të ardhmen.

“PS nuk përfaqëson më shtresat e varfra dhe të mesme, por oligarkët. Është një parti që po shkërmoqet”, deklaroi ai.