Administrata Tatimore ka njoftuar se të gjithë individët që kanë plotësuar Deklaratën Vjetore të të Ardhurave Personale (DIVA 2025) dhe rezultojnë me tatim të mbipaguar, kanë të drejtë të kërkojnë kompensimin e shumës përkatëse në llogaritë e tyre bankare.

Përfitues të këtij rimbursimi janë jo vetëm individët që kanë deklaruar shpenzimet për fëmijët në ngarkim dhe arsimin, por edhe qytetarët pa fëmijë që rezultojnë me tepricë kreditore pas rillogaritjes së tatimit mbi të ardhurat.

Sipas rregullave të reja, individët mund të përfitojnë:

• deri në 48 mijë lekë në vit për çdo fëmijë në ngarkim;
• deri në 120 mijë lekë për shpenzime arsimore.

Për herë të parë këtë vit, kompensim do të marrin edhe individët pa fëmijë, për shkak të ndryshimeve në formulën e rillogaritjes së tatimit. Për këtë kategori, procedura e aplikimit mbetet e njëjtë, por nuk kërkohet dorëzimi i certifikatës familjare.

Administrata Tatimore thekson se përfitimi i rimbursimit kushtëzohet nga deklarimi i saktë i të dhënave bankare në sistemin elektronik e-Filing. Çdo aplikues duhet të ngarkojë në format PDF dokumentin e IBAN-it të lëshuar nga banka ku është hapur llogaria.

“Siguroni që të dhënat e vendosura janë të sakta, për të shmangur vonesa në procesin e rimbursimit”, thuhet në njoftimin zyrtar të Tatimeve.

Ministri i Financave, Petrit Malaj, deklaroi se deri në përfundim të afatit të deklarimit më 31 mars janë dorëzuar gjithsej 164,263 deklarata individuale të të ardhurave, ose 25% më shumë krahasuar me të njëjtën periudhë të një viti më parë.

Sipas tij, rreth 77 mijë individë pritet të përfitojnë kompensim nga sistemi DIVA për fëmijët nën moshën 18 vjeç, ndërsa fondi total i krijuar për rimbursim arrin në 1.4 miliardë lekë. Deri tani, qytetarët kanë kërkuar transferimin e rreth 670 milionë lekëve në llogaritë e tyre bankare.

Udhëzuesi për plotësimin e llogarisë bankare në e-Filing

Hapi i parë

Qytetarët duhet të hyjnë në faqen zyrtare të sistemit e-Filing të Drejtorisë së Përgjithshme të Tatimeve, ku vendosin:

• Numrin Personal të Identifikimit (NID);
• Fjalëkalimin;
• konfirmimin e termave dhe kushteve;
• më pas klikojnë “Hyr në sistem”.

Hapi i dytë

Pas hyrjes në sistem, përdoruesi duhet të klikojë te menuja “eFiling Im”, e vendosur në shiritin horizontal të gjelbër.

Hapi i tretë

Nga lista e opsioneve që shfaqen, duhet të zgjidhet “Profili Im”.

Hapi i katërt

Në menunë anësore majtas, qytetari duhet të klikojë te seksioni “Detajet e Bankës”.

Hapi i pestë

Në faqen e hapur, përdoruesi zgjedh opsionin “Shto një llogari bankare”, ku mund të plotësojë të dhënat bankare dhe të ngarkojë dokumentin PDF të IBAN-it.

Administrata Tatimore apelon që para aplikimit qytetarët të sigurohen se kanë të gatshme:

• numrin IBAN;
• emrin e bankës;
• dokumentin vërtetues të bankës në PDF.

Hapi i gjashtë

Në fund, formulari plotësohet me të gjitha të dhënat bankare të kërkuara, në mënyrë që procedura e rimbursimit të vijojë pa vonesa.