Kreu i PD,  Sali Berisha ka akuzuar qeverinë shqiptare për, sipas tij, përjashtimin e kompanive europiane nga fitimi i tenderëve publikë në vend.

Gjatë një deklarate publike, Berisha tha se “mafia qeveritare” nuk lejon asnjë kompani nga Bashkimi Europian të fitojë kontrata me vlerë të konsiderueshme në Shqipëri, duke e cilësuar këtë situatë si shkelje të rëndë të Marrëveshjes së Stabilizim-Asociimit (MSA).

Sipas tij, të dhënat e raportuara nga organizata Open Tender EU tregojnë probleme serioze në sistemin e prokurimeve publike në vend.

Berisha kritikoi gjithashtu nivelin e transparencës në tendera, duke thënë se ai vlerësohet në nivele të ulëta dhe se sistemi elektronik i prokurimeve, i përdorur prej vitit 2010, nuk garanton sipas tij funksionim të plotë.

“Ky është një tregues i rënies së transparencës dhe një sistem që po manipulohet,” u shpreh ai.

Në deklaratën e tij, Berisha pretendoi gjithashtu se kompanitë europiane dhe ato prestigjioze nuk janë të përfshira në listën e fituesve të tenderëve të mëdhenj në Shqipëri, duke e cilësuar këtë si një situatë të pazakontë në raport me standardet europiane.

Ai shtoi se, sipas tij, kjo përbën shkelje të detyrimeve që Shqipëria ka në kuadër të Marrëveshja e Stabilizim-Asociimit, e cila kërkon trajtim të barabartë të të gjithë investitorëve dhe kompanive në garat publike.

Deklaratat e Berishës vijnë në një kontekst debati të vazhdueshëm politik për mënyrën e zhvillimit të procedurave të prokurimit publik dhe transparencës së tyre në Shqipëri.