Deklasifikimi i fundit i dokumenteve të sigurisë që lidhen me rastet e UFO-ve po shihet nga disa studiues si një tregues i një ndryshimi të thellë kulturor dhe shpirtëror në shoqërinë amerikane.

Në një artikull opinioni në “Washington Post”, profesoresha e studimeve fetare Diana Walsh Pasolka thekson se debati mbi UFO-t nuk është më thjesht një fenomen i kulturës popullore, por po merr funksione të ngjashme me ato të besimit fetar në shoqërinë moderne.

Sipas saj, publikimi i materialeve të lidhura me këto fenomene nga institucionet amerikane nuk provon ekzistencën e jetës jashtëtokësore, por krijon një lloj “legjitimimi institucional” të një narrative të re besimi.

Ajo argumenton se besimi në UFO-t nuk përbën një fe tradicionale, por në praktikë përmbush funksione të ngjashme sociale dhe kulturore, duke ndihmuar në krijimin e rrëfimeve mbi botën dhe kuptimin e ekzistencës.

Profesoresha citon gjithashtu sondazhe që tregojnë se rreth 47% e amerikanëve besojnë se alienët kanë vizituar Tokën, një shifër që sipas saj lidhet edhe me rënien e besimit në institucionet fetare tradicionale.

Sipas Pasolkës, ky fenomen është gjithnjë e më shumë anti-institucional, me mbështetës që shprehin mosbesim ndaj qeverive, mediave dhe akademisë shkencore, ndërsa kërkojnë transparencë më të madhe mbi të dhënat e UFO-ve. Në këtë debat janë përfshirë edhe figura politike si senatorët Charles Schumer dhe Mike Rounds, të cilët kanë kërkuar publikimin e plotë të informacionit.

Ajo bën gjithashtu një krahasim historik me mënyrën si interpretoheshin fenomenet misterioze në të kaluarën, duke përmendur rastin e shfaqjeve fetare në Portugali në vitin 1917, ku autoriteti institucional fetar kishte rol qendror në interpretim.

Sipas saj, sot komuniteti i UFO-ve funksionon në mënyrë horizontale përmes rrjeteve sociale dhe podkasteve, ku dëshmitë dhe videot shpërndahen drejtpërdrejt nga individët, duke ushqyer idenë e ekzistencës së inteligjencës jo-njerëzore dhe dyshimet për fshehje informacioni nga qeveritë.