Shtetet e Bashkuara duket se po kërkojnë një rrugë të shpejtë për t’i dhënë fund përplasjes me Iranin, edhe nëse një marrëveshje për programin bërthamor të Teheranit nuk arrihet në këtë fazë.
Sipas The Wall Street Journal, presidenti amerikan Donald Trump është i gatshëm të shpallë fundin e luftës nëse Irani rikthen plotësisht lëvizjen e lirë të anijeve në ngushticën e Hormuzit, një prej pikave më të rëndësishme strategjike të transportit detar në botë.
Sipas burimeve të gazetës, Trump e ka diskutuar privatisht këtë skenar me këshilltarët e tij më të lartë. Administrata amerikane prej javësh po përgatitet për mundësinë e shpalljes së fitores, në rast se Teherani pranon të hapë plotësisht këtë korridor detar.
Por rruga drejt një marrëveshjeje duket se është komplikuar ndjeshëm.
Të shtunën, Irani paraqiti një paketë kërkesash që duhet të plotësohen në këmbim të lejimit të qarkullimit të lirë të anijeve në Hormuz. Teherani kërkon miliarda dollarë nga Shtetet e Bashkuara, tërheqjen e trupave amerikane nga rajoni dhe përfundimin e bllokadës detare të vendosur nga Uashingtoni.
Këto kushte konsiderohen më të rënda se ato të paraqitura më herët nga pala iraniane dhe mund ta bëjnë më të vështirë arritjen e një marrëveshjeje të shpejtë.
Ngushtica e Hormuzit ka një rëndësi të jashtëzakonshme për ekonominë globale, pasi përmes saj kalon një pjesë e madhe e naftës dhe gazit të transportuar në tregjet ndërkombëtare. Çdo pengesë në këtë korridor sjell menjëherë shqetësime për furnizimin me energji dhe çmimet në tregjet botërore.
Sipas raportimeve, Irani ka arritur një marrëveshje me Omanin lidhur me administrimin e ngushticës, por zbatimi i saj mbetet i kushtëzuar nga pranimi i kërkesave të Teheranit nga Shtetet e Bashkuara.
Në këtë pikë, çështja e Hormuzit duket se është kthyer në një nga kartat kryesore të negociatave. Trump kërkon një dalje të shpejtë nga konflikti, ndërsa Irani po përpiqet të shfrytëzojë kontrollin mbi një prej arterieve më të rëndësishme të energjisë në botë për të siguruar lëshime të mëdha nga Uashingtoni.
