Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Partia Demokratike i ka dërguar këtë të martë një kërkesë zyrtare për informacion Kryeministrit Edi Rama dhe Presidentit Bajram Begaj lidhur me procedurën e ndjekur për propozimin dhe dekretimin e Vlora Hysenit në krye të Shërbimit Informativ të Shtetit.
Kërkesa është dorëzuar nga nënkryetari i Komisionit për Çështjet e Brendshme dhe të Mbrojtjes, Klevis Balliu, i cili kërkon informacion mbi kriteret e përdorura nga Kryeministri për propozimin e Hysenit dhe procedurën e ndjekur nga Presidenti për miratimin e saj.
Në deklaratën e tij, Balliu e lidh kërkesën me zhvillimet e fundit në hetimin e SPAK ndaj ish-drejtueses së SHISH. Hyseni është vendosur në masën e sigurisë “arrest në shtëpi” dhe është pezulluar nga detyra, në kuadër të hetimeve që lidhen me dosjen e AKSHI-t dhe kontaktet e saj të dyshuara me Ergys Agasin. Sipas njoftimeve mbi vendimin e GJKKO-së, Hyseni po hetohet për “përkrahje të autorit” dhe “nxjerrje të sekretit shtetëror ose të shërbimit”.
PD pretendon se zhvillimet e fundit ngrenë pikëpyetje mbi mënyrën se si janë administruar institucionet e sigurisë kombëtare. Në deklaratë, Balliu përmend disa institucione, mes tyre Policinë e Shtetit, AKSHI-n, strukturat e sigurisë kibernetike dhe SHISH-in, duke pretenduar se ato kanë qenë nën ndikimin e Ergys Agasit.
“Ngrihen pyetje serioze mbi mënyrën se si janë administruar institucionet më të rëndësishme të sigurisë së vendit”, shprehet Balliu.
Sipas tij, kërkesa drejtuar Ramës dhe Begajt synon të sqarojë se cilat kanë qenë kriteret dhe procedurat institucionale që çuan në emërimin e Hysenit.
Balliu kërkon gjithashtu që përgjigjja të jetë “urgjente, e plotë dhe transparente”, duke argumentuar se çështja lidhet drejtpërdrejt me sigurinë kombëtare dhe funksionimin e institucioneve shtetërore.
Zhvillimet ndaj Hysenit vijnë pasi në kuadër të hetimit të SPAK janë bërë publike të dhëna mbi komunikimet e saj me Ergys Agasin. Sipas materialeve të raportuara nga media dhe të lidhura me dosjen hetimore, mes tyre janë evidentuar qindra komunikime gjatë periudhës kur Agasi ishte në kërkim.
Hetimi është në zhvillim dhe pretendimet e palëve duhet të ndahen nga një vendim përfundimtar gjyqësor mbi përgjegjësinë penale.
