Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Ish-kreu i Shërbimit Federal të Inteligjencës së Gjermanisë (BND), August Hanning, është arrestuar nën dyshimin për spiunazh, tradhti dhe marrje të informacionit të klasifikuar për një fuqi të huaj.
Hanning, 80 vjeç, drejtoi BND-në nga viti 1998 deri në vitin 2005 dhe më pas punoi si konsulent privat. Sipas Prokurorisë Federale Gjermane, ai dyshohet se ka përdorur informacione të klasifikuara për të përgatitur një analizë për një përfaqësues të një shërbimi të huaj inteligjence, ndërsa për vite me radhë dyshohet se ka mbajtur kontakte edhe me një tjetër shërbim të huaj.
Autoritetet gjermane nuk kanë bërë të ditur se cilat shtete apo shërbime inteligjence janë përfshirë në çështje. Sipas Reuters, prokurorët thanë se ende nuk është e qartë nëse analiza e përgatitur nga Hanning ka mbërritur te marrësi i synuar.
Në të njëjtën operacion është arrestuar edhe ish-punonjësi i BND-së, Manfred D., i cili dyshohet se i ka siguruar Hanningut rreth 2 mijë dokumente gjatë viteve, në këmbim të pagesave.
Sipas prokurorëve, shumë prej dokumenteve përmbanin informacion të klasifikuar, i destinuar vetëm për përdorim të brendshëm nga BND-ja, përfshirë materiale të përdorura në informimet e nivelit të lartë të institucioneve gjermane. Manfred D. dyshohet se kishte akses në këto materiale për shkak të funksioneve që mbante në shërbimin inteligjent.
Dyshimet për bashkëpunimin mes tyre lidhen me një marrëveshje të vitit 2010. Sipas prokurorisë, Manfred D. do t’i transmetonte Hanningut në mënyrë të vazhdueshme informacion nga BND-ja, kundrejt shpërblimit financiar.
Hetuesit dyshojnë se Hanning e përdori informacionin e marrë për aktivitetin e tij privat si konsulent. Në një rast, sipas prokurorëve, ai përdori të dhëna të klasifikuara për të përgatitur një analizë për një zyrtar të një shërbimi të huaj inteligjence.
Hanning u arrestua në banesën e tij në Nordwalde, pranë Münsterit, ndërsa Manfred D. u arrestua në Bavari. Banesat dhe ambiente të lidhura me të dyshuarit janë kontrolluar nga autoritetet gjermane.
Manfred D. pritet të dalë para gjykatës federale në Karlsruhe, ndërsa Hanning do të paraqitet para gjyqtarit të mërkurën.
Hetimi ndaj Hanningut lidhet edhe me një çështje tjetër të bujshme në Gjermani, atë të rrëmbimit të fëmijëve të familjes së biznesmenes Christina Block. Gjatë hetimeve në këtë çështje, autoritetet dyshohet se gjetën materiale që çuan te hetimi për dokumentet e klasifikuara.
