Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Ndërsa Mali i Zi po përgatitet për hapin drejt traktatit të anëtarësimit në Bashkimin Europian, Shqipëria ndodhet ende në fazën e negociatave dhe përpara saj mbetet një pjesë e rëndësishme e procesit.
Shqipëria ka hapur të gjithë 33 kapitujt e negociatave, por deri tani ka arritur të mbyllë përkohësisht vetëm tre prej tyre. Ky është momenti ku ndodhet aktualisht procesi i integrimit europian të vendit.
Tre kapitujt e mbyllur janë Shkenca dhe Kërkimi, Arsimi dhe Kultura dhe Marrëdhëniet e Jashtme. Pjesa tjetër e kapitujve mbetet ende e hapur dhe duhet të përmbushen kushtet e vendosura nga Bashkimi Europian për mbylljen e tyre.
Hapja e të gjithë kapitujve ishte një objektiv i rëndësishëm për Shqipërinë, por tashmë sfida kryesore është kalimi nga hapja te mbyllja e kapitujve.
Drejtësia dhe lufta kundër korrupsionit mbeten në qendër
Pjesa më e ndjeshme e negociatave lidhet me grupkapitullin “Themeloret”, ku përfshihen shteti i së drejtës, funksionimi i institucioneve, reforma në drejtësi, lufta kundër korrupsionit dhe krimit të organizuar, të drejtat themelore dhe funksionimi demokratik i institucioneve.
Ky grupkapitull ka një peshë të veçantë, pasi progresi në këto fusha përcakton edhe ritmin e përgjithshëm të negociatave.
Në maj të këtij viti, Shqipëria përmbushi benchmark-et e ndërmjetme për grupkapitullin “Themeloret”, duke i hapur rrugë fazës së mbylljes së kapitujve. Por kjo nuk do të thotë se procesi ka përfunduar.
Komisioni Europian kërkon rezultate konkrete dhe të qëndrueshme në zbatimin e reformave, veçanërisht në drejtësi, luftën kundër korrupsionit dhe forcimin e institucioneve.
Çfarë e mban ende Shqipërinë në negociata?
Përtej hapjes së kapitujve, Shqipëria duhet të përmbushë një sërë kushtesh për secilin prej tyre përpara se ato të mbyllen përkohësisht.
Në këtë proces, Brukseli vlerëson jo vetëm miratimin e ligjeve dhe reformave, por edhe mënyrën se si ato zbatohen në praktikë.
Për Shqipërinë, ndër çështjet që vazhdojnë të kenë rëndësi janë pavarësia dhe eficienca e sistemit gjyqësor, lufta kundër korrupsionit, konfiskimi i pasurive kriminale, lufta kundër krimit të organizuar, reforma zgjedhore, administrata publike, liria dhe pluralizmi i medias, si dhe forcimi i institucioneve të pavarura.
Qeveria shqiptare ka vendosur si objektiv përfundimin e negociatave të anëtarësimit në fund të vitit 2027. Por për të arritur këtë afat, Shqipëria duhet të mbyllë dhjetëra kapituj në një periudhë relativisht të shkurtër.
Në këtë pikë qëndron edhe diferenca me Malin e Zi. Podgorica ka mbyllur përkohësisht 18 nga 33 kapitujt, ndërsa Shqipëria vetëm tre.
Mali i Zi synon të përfundojë negociatat gjatë vitit 2026 dhe Komisioni Europian ka deklaruar se traktati i anëtarësimit mund të nënshkruhet gjatë vitit 2027, me mundësinë që vendi të bëhet anëtar i BE-së në vitin 2028.
Shqipëria, në anën tjetër, është ende në fazën e mbylljes së kapitujve. Për të kaluar në hapin e traktatit të anëtarësimit, duhet fillimisht të përfundojë negociatat dhe të sigurojë marrëveshjen e vendeve anëtare për rezultatet e arritura.
