Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Një video me përmbajtje të rëndë ka nisur të qarkullojë gjatë paradites së sotme në rrethin e disa gazetarëve, duke ngritur dyshime për një rast të mundshëm të cenimit seksual të një vajze.
Në pamje shfaqen dy burra në një ambient që duket të jetë restorant, ndërsa vajza paraqitet në një gjendje të rënduar dhe duket se kundërshton veprimet e tyre. Pamjet, të cilat kërkojnë verifikim të plotë mbi autenticitetin, kohën dhe vendin e regjistrimit, kanë shkaktuar reagime për shkak të përmbajtjes së tyre.
Në rrjete dhe në komunikime private janë hedhur pretendime se njëri prej personave në video mund të jetë një drejtues dhe analist i njohur në Tiranë, i identifikuar me inicialet F.H.. Ky pretendim nuk është konfirmuar nga ndonjë autoritet dhe identiteti i personit nuk mund të konsiderohet i provuar vetëm nga pamjet.
Personi i dytë nuk identifikohet qartë, pasi në pjesën kryesore të videos shfaqet me shpinë nga kamera.
Edhe për vajzën janë përhapur pretendime se mund të jetë një personazh i njohur i ekranit, por as ky informacion nuk është konfirmuar. Për këtë arsye, identitetet e personave që pretendohet se shfaqen në video nuk mund të përcaktohen pa një verifikim zyrtar.
Dyshimet kërkojnë hetim
Përmbajtja e videos ngre dyshime serioze nëse veprimet e paraqitura janë kryer pa pëlqimin e vajzës. Në disa momente ajo duket se kundërshton dhe përpiqet të shmangë situatën.
Megjithatë, vetëm nga një video e shkëputur nuk mund të përcaktohen rrethanat e plota të ngjarjes, përfshirë kohën, vendin, çfarë ka ndodhur para dhe pas regjistrimit apo nëse materiali është i plotë dhe autentik.
Deri tani nuk ka një informacion zyrtar nëse Policia e Shtetit apo Prokuroria kanë marrë një kallëzim apo kanë nisur verifikime lidhur me këto pamje.
Nëse materiali është autentik dhe përmbajtja përputhet me pretendimet që po qarkullojnë, rasti kërkon verifikim të menjëhershëm nga autoritetet kompetente, përfshirë identifikimin e personave, marrjen e dëshmisë së vajzës dhe ekspertimin e videos.
Ngjarja dyshohet paraprakisht se ka ndodhur gjatë muajve të fundit, por edhe kjo rrethanë mbetet për t’u konfirmuar zyrtarisht.
