Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Shoqata e të Zgjedhurve Vendorë i është drejtuar me një letër Këshillit të Europës dhe Kongresit të Autoriteteve Vendore, duke kërkuar vëmendjen e institucioneve europiane për procesin e riorganizimit territorial dhe ndryshimin e kufijve të bashkive në Shqipëri.
Shoqata, ku bëjnë pjesë edhe kryebashkiakë të zgjedhur nga Partia Demokratike, ngre shqetësimin se procesi po zhvillohet në mënyrë të njëanshme dhe pa një konsultim të mjaftueshëm me komunitetet e prekura dhe këshilltarët vendorë.
Sipas saj, 15 bashki rrezikojnë të shkrihen ose të ndryshojnë kufijtë, ndërsa komunitetet që preken nga ndryshimet nuk janë përfshirë në mënyrë të mjaftueshme në diskutimin për riorganizimin.
Në letrën drejtuar institucioneve europiane, Shoqata e të Zgjedhurve Vendorë kërkon reagimin dhe ndërhyrjen e tyre përpara se ndryshimet e propozuara të mbërrijnë për miratim në Kuvend.
Shoqata argumenton se ndryshimi i kufijve të njësive të qeverisjes vendore duhet të shoqërohet me konsultim real me komunitetet dhe me respektimin e parimeve të Kartës Europiane të Vetëqeverisjes Vendore.
Në materialet e përcjella institucioneve europiane, shoqata thotë se ka përfshirë edhe dokumente që, sipas saj, dëshmojnë se qytetarët dhe këshilltarët vendorë në 15 bashkitë e prekura janë anashkaluar gjatë procesit.
Kërkohet ndërhyrja para votimit në Kuvend
Shoqata e lidh çështjen jo vetëm me interesat e komuniteteve që mund të preken nga ndryshimi i hartës territoriale, por edhe me respektimin e standardeve europiane për demokracinë lokale dhe detyrimeve ndërkombëtare që Shqipëria ka marrë përsipër.
Në letrën e tyre, të zgjedhurit vendorë kërkojnë që institucionet europiane ta ndjekin nga afër procesin përpara miratimit të ndryshimeve.
Sipas Shoqatës, miratimi i një riorganizimi territorial pa një proces të plotë konsultimi do të cenonte interesat e komuniteteve vendore dhe do të ngrinte pikëpyetje mbi zbatimin e parimeve të vetëqeverisjes lokale në Shqipëri.
Çështja e ndarjes territoriale pritet të marrë një rëndësi të veçantë në vijim, pasi ndryshimi i kufijve të bashkive prek drejtpërdrejt organizimin e pushtetit vendor dhe përfaqësimin e komuniteteve në nivel lokal.
