Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Këshilli i Ministrave ka vendosur krijimin e Agjencisë Shtetërore të Posaçme të Shtetësisë, një strukturë që do të merret me procedurat për fitimin e shtetësisë shqiptare nga shtetas të huaj, kur aftësitë, veprimtaria ose cilësitë e tyre vlerësohen si të dobishme për interesat e Shqipërisë.
Agjencia e re do të jetë në varësi të ministrit përgjegjës për punët e brendshme dhe do të trajtojë kërkesat për fitimin e shtetësisë shqiptare me natyralizim për interes të posaçëm shtetëror.
Sipas vendimit të qeverisë, shtetësia mund t’u jepet të huajve kur aftësitë e tyre, rrethanat specifike ose veprimtaria private dhe publike vlerësohen se i shërbejnë interesit të shtetit shqiptar në një fushë të caktuar.
Ministritë do të vlerësojnë përfitimet për Shqipërinë
Procedura do të përfshijë vlerësimin e interesit të posaçëm shtetëror nga ministria që mbulon fushën përkatëse. Kjo ministri do të ketë përgjegjësinë të identifikojë dhe të argumentojë arsyet përse dhënia e shtetësisë një shtetasi të huaj konsiderohet në interes të vendit.
Vendimi përcakton rregulla për aplikimin, shkëmbimin e informacionit mes institucioneve, dokumentimin e interesit shtetëror dhe kryerjen e kontrolleve të sigurisë e të pastërtisë së figurës së aplikantëve.
Kërkesën për fitimin e shtetësisë mund ta paraqesë vetë shtetasi i huaj ose një përfaqësues i tij, i pajisur me prokurë. Përfituesit duhet të plotësojnë kriteret e përcaktuara në vendimin e ri dhe kushtet e parashikuara nga ligji për shtetësinë shqiptare.
Në procedurë mund të përfshihen edhe familjarët
Rregullat e miratuara parashikojnë që në procedurën për vlerësimin e interesit të posaçëm shtetëror të përfshihen edhe familjarët e aplikantit. Këtu bëjnë pjesë bashkëshorti ose bashkëshortja dhe fëmijët e mitur, ndërsa kur aplikanti është i mitur, përfshihen edhe prindërit e tij.
Krijimi i agjencisë synon të vendosë një procedurë të posaçme për trajtimin e kërkesave të kësaj kategorie, duke përcaktuar rolin e institucioneve që do të shqyrtojnë aplikimet dhe do të vlerësojnë përfitimin që mund t’i sjellë vendit dhënia e shtetësisë.
Vendimi nuk parashikon dhënien automatike të shtetësisë për shtetasit e huaj. Çdo kërkesë do t’i nënshtrohet vlerësimit të interesit shtetëror dhe kontrolleve të përcaktuara në kuadrin ligjor.
