Alarmi është dhënë fillimisht nga kompania gjermane “Dirk Rossmann GmbH”, e cila ka kërkuar tërheqjen parandaluese të produktit nga tregu për shkak të rrezikut të mundshëm për konsumatorët.

Sipas njoftimit zyrtar të AKU-së, bëhet fjalë për produktin:

“EnerBiO Dinkel Waffeln Natur”
EAN: 4305615676876 / DAN 055700
Datë skadence: 18.01.2027

Institucioni bën me dije se subjekti importues ka nisur menjëherë tërheqjen e artikullit nga të gjitha pikat e shitjes, pa dallim loti apo date skadence, ndërsa po vijojnë verifikimet dhe kontrollet përkatëse.

AKU u ka bërë thirrje qytetarëve që, nëse e kanë blerë këtë produkt dhe e kanë ende në përdorim, të mos e konsumojnë dhe ta rikthejnë pranë marketeve ku është blerë.

Ky është rasti i dytë brenda pak ditësh që përfshin produkte të tregtuara në “Rossmann & Lala”, pas alarmit të mëparshëm për qumësht pluhur për bebe të moshës 0-2 vjeç, çka ka shtuar shqetësimet për sigurinë ushqimore dhe kontrollet mbi produktet e importuara.

Në njoftimin e saj, AKU thekson se po ndjek procedurat ligjore për verifikimin e plotë të rastit, ndërsa paralajmëron masa ndaj çdo subjekti që shkel standardet e sigurisë ushqimore.

Mykotoksinat konsiderohen substanca të rrezikshme që prodhohen nga myku dhe mund të kenë efekte të dëmshme për shëndetin, sidomos te fëmijët dhe personat me imunitet të dobët.