Pas disa muajsh negociatash, Franca dhe Britania e Madhe kanë rënë dakord për rinovimin e Traktatit të Sandhurst për një periudhë trevjeçare.
Marrëveshja, e nënshkruar fillimisht në vitin 2018 dhe e zgjatur për herë të parë në vitin 2023, do të mbetet në fuqi deri në vitin 2026. Sipas kushteve të reja, autoritetet britanike do të mund të ofrojnë deri në 766 milionë euro gjatë tre viteve, përfshirë një komponent fleksibël prej 186 milionë eurosh, i cili do të varet nga efektiviteti i masave të zbatuara në terren.
Kjo rritje e angazhimit financiar nënkupton se Londra garanton një kontribut minimal prej 580 milionë eurosh, krahasuar me 540 milionë euro në marrëveshjen e mëparshme.
Një tjetër element i rëndësishëm i marrëveshjes është forcimi i kapaciteteve operacionale në Kanalin e La Manshit, ku numri i oficerëve të policisë të angazhuar në monitorim pritet të dyfishohet, duke arritur në rreth 1,400 deri në vitin 2029.
Në kuadër të marrëveshjes, një njësi e CRS, e financuar nga Franca, do të fokusohet në luftën kundër migracionit të paligjshëm. Kjo njësi pritet të përdorë mjete të avancuara teknologjike, përfshirë dronë, helikopterë dhe sisteme elektronike monitorimi, me qëllim forcimin e kontrollit kufitar dhe parandalimin e kalimeve të paligjshme.
Marrëveshja shihet si një hap i rëndësishëm në bashkëpunimin mes dy vendeve për menaxhimin e flukseve migratore në Kanalin e La Manshit.
