Një deklaratë e Taulant Mukës në rrjetet sociale ka rikthyer në vëmendje diskutimin mbi kufirin mes detyrës publike të drejtuesve të universiteteve dhe interesave private.
Muka thotë se ka parë një video ku Dekania e Fakultetit të Mjekësisë Dentare, Silvana Bara, promovon kurse private me pagesë në fushën e stomatologjisë. Sipas tij, kjo nuk duhet parë thjesht si një rast i veçuar, por si një praktikë që, në universitetet shqiptare, është hasur prej vitesh.
Në reagimin e tij, Muka ngre disa pikëpyetje mbi natyrën e këtij promovimi dhe marrëdhënien që mund të ekzistojë mes institucionit publik dhe subjektit privat.
Ai kërkon të sqarohet nëse bëhet fjalë për një bashkëpunim zyrtar të Fakultetit me subjektin që ofron kurset, nëse ekziston ndonjë marrëdhënie profesionale apo financiare dhe, në rast se ajo ekziston, nëse është deklaruar në përputhje me kërkesat ligjore dhe rregullat e etikës akademike.
Sipas Mukës, çështja kryesore është pikërisht kufiri mes rolit institucional dhe promovimit të një interesi privat.
Ai thekson se bashkëpunimi mes universiteteve publike dhe sektorit privat është i nevojshëm, pasi mund të sjellë ekspertizë, teknologji dhe mundësi praktike për studentët. Por, sipas tij, një bashkëpunim i tillë duhet të jetë transparent, institucional dhe në funksion të studentëve.
Një tjetër pyetje që ngre Muka lidhet me vetë përmbajtjen e kurseve. Nëse ato ofrojnë njohuri të rëndësishme për formimin profesional të stomatologëve, ai pyet pse këto njohuri nuk përfshihen në programet akademike apo në aktivitetet e edukimit në vazhdim të universitetit.
Në reagimin e tij, Muka shprehet se studentët e një universiteti publik nuk duhet të krijojnë përshtypjen se formimi i tyre profesional mund të jetë i plotë vetëm përmes kurseve private me pagesë, sidomos kur këto promovohen nga drejtues të vetë institucionit ku ata studiojnë.
Ai e ndan këtë çështje nga një qëndrim kundër sipërmarrjes private apo individëve që ofrojnë kurse profesionale. Sipas tij, debati lidhet me transparencën, etikën dhe ndarjen e qartë mes përgjegjësisë publike dhe interesit privat.
Në fund, Taulant Muka pyet se ku mbaron përgjegjësia institucionale dhe ku fillon promovimi i interesit privat?
