Milani po përgatitet për një verë të nxehtë në merkato, jo vetëm me largime, por edhe me lëvizje të rëndësishme për të forcuar mesfushën.

Me largimin e konfirmuar të Tijani Reijnders dhe të ardhmen e pasigurt të Yunus Musah, reparti qendror ka mbetur i zbrazët, ndërkohë që ardhja e Luka Modric e mbush vetëm pjesërisht këtë boshllëk.

Në këtë kuadër, drejtori sportiv Igli Tare është vënë në lëvizje dhe duket se ka një emër mbi të gjithë në listën e tij: Granit Xhaka.

Mesfushori shqiptar i kombëtares zvicerane dhe Bayer Leverkusen është prioriteti absolut i Tares, i cili e sheh si njeriun e duhur për të sjellë ekuilibër dhe përvojë në skuadrën e re që po ndërtohet rreth projektit të Massimiliano Allegrit.

Shtatë vitet e Xhakës në Premier League me fanellën e Arsenalit dhe sezoni i shkëlqyer me Leverkusenin kanë lënë gjurmë në karakterin dhe stilin e tij të lojës. Ai është një lider në fushë dhe për Milani, një profil i tillë është më i nevojshëm se kurrë.

Megjithatë, Bayer Leverkusen nuk është i gatshëm ta lëshojë lehtë. Xhaka ka kontratë deri në vitin 2028 dhe klubi gjerman e vlerëson rreth 12 milionë euro.

Në sfond mbetet ende pista Adrien Rabiot, i kontaktuar nga vetë Allegri, por i bllokuar aktualisht nga një ofertë e fortë nga Olympique Marseille.

Në rast se edhe kjo gjurmë dështon, Milani po konsideron alternativa si Ardon Jashari i Bruges, një tjetër emër premtues nga Zvicra, edhe pse me një çmim të kripur prej rreth 35 milionë eurosh.

Më i arritshëm duket Javi Guerra i Valencias, i cili pëlqehet prej kohësh nga kuqezinjtë dhe po luan aktualisht me Spanjën U21.

Megjithatë, për Taren, prioriteti mbetet i qartë: Granit Xhaka është lojtari që ai e do me çdo kusht dhe Milani po bën gjithçka për ta sjellë në San Siro.