Detaje të reja kanë dalë nga takimi i zhvilluar me dyer të mbyllura mes Kryeministrit Edi Rama, deputetëve të qarkut Tiranë dhe drejtuesve të Bashkisë së Tiranës, ku janë diskutuar disa vendime të rëndësishme administrative dhe politike.
Sipas burimeve, Kryeministri u ka lënë si detyrë drejtuesve të qarqeve që të nisin menjëherë procesin e rifreskimit të stafeve të bashkive, në mënyrë të veçantë në bashkitë që janë qendra qarqesh. Ky proces nuk do të përfshijë Tiranën, për shkak të situatës aktuale me një kryetare të komanduar.
Shërbimet online, jo më me pagesë për pensionistët
Një tjetër urdhër i prerë i Ramës lidhet me shërbimet publike digjitale. Ai ka kërkuar heqjen e licencave për noterët dhe avokatët që, në kundërshtim me ligjin, ofrojnë shërbime të e-Albania me pagesë për pensionistët dhe kategori të tjera të pambrojtura.
“Ky është një abuzim që duhet të marrë fund. Asnjë pensionist nuk duhet të paguajë për një dokument online,” mësohet të ketë deklaruar Kryeministri.
Në vend të kësaj praktike, Rama ka urdhëruar që bashkitë të marrin përsipër ofrimin e shërbimeve e-Albania për qytetarët, duke nisur nga bashkitë qendër qarku, me një model të ri funksionimi që pritet të prezantohet së shpejti.
