Rajonet e Donetskut dhe Luhanskut, të njohura si Donbasi, janë rikthyer në qendër të diskutimeve për një marrëveshje të mundshme paqeje në Ukrainë.

Mediat ndërkombëtare raportojnë se presidenti rus Vladimir Putin i ka paraqitur presidentit amerikan Donald Trump, gjatë takimit në Alaskë më 15 gusht, një ofertë sipas së cilës Ukraina duhet të tërhiqet nga Donbasi. Në këmbim, Rusia do të pranonte ngrirjen e fronteve aktuale në Zaporizhzhia dhe Kherson.

Aktualisht, Luhansku është pothuajse i gjithë nën kontroll rus, ndërsa Ukraina mban rreth 30% të Donetskut, përfshirë qytete dhe fortifikime kyçe. Luftimet në këtë zonë kanë shkaktuar dhjetëra mijëra viktima në radhët e forcave ukrainase.

Presidenti ukrainas Volodymyr Zelenski e ka kundërshtuar prerë propozimin rus, duke theksuar se çdo dorëzim territori do të ishte i papranueshëm dhe do të shfrytëzohej nga Moska si bazë për sulme të reja. Ai kujtoi gjithashtu se Kushtetuta e Ukrainës kërkon referendum gjithëkombëtar për çdo ndryshim territorial.

Sipas të dhënave, që nga viti 2014 mbi 1.5 milionë ukrainas janë zhvendosur nga Donbasi, ndërsa mbi tre milionë jetojnë sot nën okupimin rus. Rreth 300 mijë banorë ndodhen ende në zonat që mbahen nga forcat ukrainase.

Donbasi është një nga rajonet më të pasura të vendit për nga resurset minerare dhe industria, duke e bërë atë një zonë strategjike me peshë të madhe ekonomike e politike.