Në Bashkinë e Mirditës, e cila drejtohet nga Partia Demokratike, nuk është zbatuar urdhri i kryeministrit Edi Rama për shkarkimin e nënkryetarëve dhe drejtuesve të njësive administrative.

Kryetari i Bashkisë, Albert Melyshi, e ka cilësuar këtë vendim të kreut të qeverisë si të padrejtë dhe antiligjor, pasi sipas tij cenon rëndë kompetencat e pushtetit vendor. Ai theksoi se vlerësimi i drejtuesve bëhet nga vetë bashkia, mbi bazën e performancës dhe shërbimit që u ofrojnë qytetarëve.

“Nuk mundet në asnjë ligj që kryeministri të urdhërojë shkarkimin e drejtorëve apo administratorëve. Kjo është një procedurë që ndiqet në bashki, bazuar në performancën e secilit apo në veprimet që kanë në shërbim të qytetarëve. Në Bashkinë e Mirditës kjo bëhet çdo tre muaj dhe, nëse nuk realizohen detyrat, masa shkon deri te shkarkimi,” u shpreh Melyshi për RTSH.

Pak javë më parë, kryeministri Rama, në një takim me kryetarët e bashkive, kërkoi që të shkarkohen menjëherë nënkryetarët dhe drejtuesit e njësive administrative në të gjithë vendin. Por ky urdhër nuk është zbatuar as në Bashkinë e Mirditës, as në atë të Lezhës, ku deri më tani nuk është ndërmarrë asnjë lëvizje në këtë drejtim.