Kryeministri i Shqipërisë, Edi Rama, ka reaguar me tone të forta ndaj deklaratës së Sekretares së Brendshme të Mbretërisë së Bashkuar, Shabana Mahmood, e cila një ditë më parë tha se “rreth 700 familje shqiptare, përfshirë fëmijë, me kërkesa të refuzuara për azil, nuk po largohen nga Britania” dhe se qeveria britanike duhet të rifillojë procesin e largimit të tyre.
Deklarata e Mahmood, e bërë në kuadër të paketës së re të masave të qeverisë Laburiste për trajtimin e emigracionit të parregullt, ka ngjallur reagimin e menjëhershëm të kryeministrit shqiptar, i cili e konsideroi këtë qasje të gabuar, të padrejtë dhe të nxitur nga presioni i brendshëm politik në Britani.
Rama: Retorikë e së djathtës ekstreme, e papranueshme për një vend aleat
Në një postim të gjatë në X, Rama shprehet i zhgënjyer që një përfaqësuese e qeverisë Laburiste, e cila historikisht njihet për qëndrime më të moderuara, “i bën jehonë retorikës së së djathtës ekstreme populiste” në lidhje me emigracionin.
Sipas tij, të veçosh 700 familje shqiptare nga mijëra raste të tjera të emigracionit të parregullt në Britani është “statistikisht i parëndësishëm, politikisht i padrejtë dhe moralisht i dënueshëm”.
“Si mundet që Sekretarja e Brendshme të synojë të justifikojë politika të reja të kthimit duke vënë në shënjestër shqiptarët, pikërisht në një moment kur partneriteti Shqipëri–Britani funksionon dhe ka dhënë nga rezultatet më të mira në Evropë?”, shkruan Rama, duke theksuar se ky narrativ rrezikon të krijojë frymë të gabuar ndaj një komuniteti të tërë.
Kryeministri rikujton se nga fundi i vitit 2022 deri më sot, falë bashkëpunimit të ngushtë mes dy vendeve, mbërritjet e parregullta të qytetarëve shqiptarë përmes Kanalit të La Manshit janë thuajse të zhdukura.
Shqipëria dhe Britania e Madhe firmosën një marrëveshje bashkëpunimi ku parashikohej rritja e operacioneve të inteligjencës, shkëmbimi i të dhënave, procedura më e shpejtë e riatdhesimeve dhe luftimi i rrjeteve kriminale që shfrytëzonin emigrantët.
Sipas Ramës, këto masa kanë funksionuar dhe Britania e Madhe duhet t’i njohë si histori suksesi në vend që t’i mohojë me deklarata që përqendrohen te “700 familje të vetme”.
Një tjetër pikë që thekson Rama është fakti që shqiptarët që jetojnë në Britani përbëjnë një komunitet të integruar, me nivel të lartë punësimi dhe me një përqindje shumë më të ulët të përfitimeve sociale krahasuar me komunitetet e tjera emigrante.
Ai e cilëson retorikën e përdorur nga Mahmood si të rrezikshme, pasi sipas tij, përforcon stereotipe që shërbejnë si “ushqim politik për partitë e ekstremit të djathtë” dhe cenojnë marrëdhëniet e besimit mes dy vendeve.
Kritikë ndaj politikave të vizave të epokës Braverman
Rama rikthehet edhe te çështja e regjimit të vizave, duke kujtuar se shumë nga kufizimet aktuale në lëvizjen e qytetarëve shqiptarë drejt Britanisë janë trashëguar nga politikat e ish-sekretares së Brendshme Suella Braverman, e njohur për qasje tejet të ashpra ndaj emigracionit.
“Këto kufizime dëmtojnë lirinë themelore të lëvizjes së njerëzve, por edhe vetë ekonominë britanike”, shkruan ai, duke bërë thirrje që marrëdhëniet mes dy vendeve të mos varen nga politika të brendshme me natyrë ideologjike.
Në reagimin e tij, kryeministri nënvizon se Shqipëria mbetet një aleat i rëndësishëm i Britanisë së Madhe në Ballkan, jo vetëm në çështjet e migracionit, por edhe në sigurinë rajonale, mbrojtjen dhe luftën kundër krimit të organizuar.
Ai i bën apel qeverisë britanike që të fokusohet te zgjerimi i këtij bashkëpunimi, në vend të veçimit të një komuniteti që, sipas tij, ka dhënë kontribute të qarta dhe të matshme në shoqërinë britanike.
Rama e mbyll reagimin me një thirrje për reflektim të qartë: qeveritë nuk mund të ndërtojnë politika mbi stereotipe etnike dhe se Britania e Madhe, si një demokraci e zhvilluar, duhet të tregojë standarde të larta kur prek komunitete aleate.
“Shqiptarët nuk mund të përdoren si shembull i gabuar për probleme të gjera që nuk lidhen me ta. Kjo nuk i shërben as politikës, as shoqërisë, dhe mbi të gjitha cenon marrëdhëniet mes dy vendeve”, shkruan ai.
