Dy zyrtarë të lartë të sistemit të drejtësisë shqiptare, Oltion Bistri, ish‑drejtuesi i Forcave Operacionale të Policisë së Shtetit, dhe Xhevahir Lita, ish-prokuror dhe kreu i Prokurorisë së Kukësit, janë përballur me akuza serioze që kanë kaluar gjykatë, por kanë përfunduar me dënime të ulëta, duke shkaktuar debat të gjerë në opinionin publik.
Nuk janë thjesht dyshime, por akuza konkrete që kanë arritur deri në vendim gjyqësor. Oltion Bistri është përballur me akuza për korrupsion pasiv, zbulim të akteve sekrete dhe pastrim parash, ndërsa Xhevahir Lita akuzohet për korrupsion pasiv dhe zbulim të informacionit sekret, duke favorizuar persona të caktuar në hetime dhe vendimmarrje prokuroriale.
Hetimet e Prokurorisë së Posaçme kundër Korrupsionit dhe Krimit të Organizuar (SPAK) zbuluan se të dy zyrtarët kishin lidhje me individë të përfshirë në aktivitet të paligjshëm, përfshirë lojëra fati të paligjshme dhe përfitime ekonomike të dyshimta. SPAK sekuestruar pasuri të Bistrit në vlerë rreth 1 milion euro, duke pretenduar se janë fituar në mënyrë të paligjshme, dhe përdori prova të mbledhura nga komunikimet e koduara të Sky ECC dhe EncroChat për të dokumentuar koordinimin e tyre me individët e përfshirë në krim.
Vendimi gjyqësor, megjithatë, ka qenë i lehtë krahasuar me rëndësinë e posteve që kanë mbajtur dy zyrtarët. Oltion Bistri u dënua me 3 vite burg për zbulim të akteve sekrete, por gjykimi i shkurtuar bëri që dënimi praktikisht të konsiderohet i kryer. Ai u shpall i pafajshëm për akuzën e korrupsionit. Xhevahir Lita, nga ana tjetër, u dënua me 5 vite burg, por dënimi u uli në 3 vite e 4 muaj për shkak të gjykimit të shkurtuar. SPAK kërkoi gjithashtu konfiskimin e 1.3 milion eurove pasuri të Bistrit, por gjykata e rrëzoi këtë kërkesë. Të dy janë liruar nga burgu pas vendimit, ndërsa Bistri ka bërë rekurs në Gjykatën e Lartë për të rikthyer pasuritë e sekuestruara.
Ky rast ka nxjerrë në pah dobësitë e sistemit të drejtësisë dhe sfidat që ka SPAK në luftën kundër korrupsionit në nivelet më të larta. Dy zyrtarë që kanë pasur akses te informacionet më sensitive dhe kanë vendosur mbi hetime të rëndësishme penale janë gjykuar dhe dënuar lehtë, duke ngritur debate mbi seriozitetin e masave kundër korrupsionit.
Rasti i njohur si “Metamorfoza” tregon përpjekjet e SPAK për të goditur korrupsionin struktural, por vendimet e gjykatës ngjallin pyetje mbi efektivitetin e këtyre përpjekjeve dhe fuqinë reale të sistemit për të ndëshkuar zyrtarët e lartë që shkelin ligjin.
