Seanca plenare e Kuvendit të Shqipërisë u shoqërua me tensione të forta dhe përplasje fizike, duke u mbyllur pa zhvilluar punimet e parashikuara, për shkak të kaosit të krijuar nga deputetët e opozitës.

Me kërkesë të kreut të grupit parlamentar të Partisë Socialiste, Taulant Balla, Kuvendi kaloi drejtpërdrejt në votim rendin e ditës, ndërkohë që në sallë vijonin përplasjet mes deputetëve të opozitës dhe punonjësve të Gardës së Republikës. Mazhoranca votoi rendin e ditës dhe më pas seanca plenare u mbyll.

Para nisjes zyrtare të punimeve, deputetët e opozitës u futën në sallën plenare dhe u ulën në karriget e kabinetit qeveritar, duke zënë vendet e ministrave. Gardistët u përpoqën t’i largonin nga zonat e ndaluara, por deputetët refuzuan të lëvizin, çka solli shtyrje dhe përplasje fizike mes palëve.

Në këtë atmosferë kaotike u zhvillua edhe votimi për Avokatin e Popullit. Endri Shabani u votua në mes të tensioneve dhe zhurmës, ndërsa pas përfundimit të procedurës ai u largua nga salla, duke përshëndetur deputetët e opozitës me puthje, një gjest që u komentua gjerësisht në rrjetet sociale.

Pamjet nga seanca tregojnë momente tensioni ekstrem. Në një video të publikuar online, deputeti Flamur Noka shihet duke lagur me ujë një punonjës të Gardës së Republikës, si edhe ministrin e Bujqësisë, Andis Sallën. Ndërkohë, deputetë të mazhorancës shfaqen duke ndjekur zhvillimet nga vendet e tyre, duke qeshur dhe duke regjistruar skenat me telefonat celularë.

Seanca e sotme, e cila ishte ndër të fundit për këtë vit parlamentar, u mbyll pa debat dhe pa diskutim të projektligjeve, duke reflektuar një klimë të rënduar politike dhe përplasjen e thellë mes mazhorancës dhe opozitës.