Kryeministri Edi Rama komentoi në konferencën e fundvitit me gazetarët mbi paraburgimin e kryetarit të Bashkisë së Tiranës, Erion Veliaj, duke e cilësuar si një rast që pasqyron problematikat e sistemit të drejtësisë në vend.

Rama tha se ende nuk është në dijeni të akuzave konkrete ndaj Veliajt dhe shprehu shqetësimin për mënyrën se si administrohen çështjet e paraburgimit. Ai theksoi se çdo qytetar duhet të gjykohet mbi bazën e provave dhe se askush nuk mund të kompensojë periudhën e humbur nëse rezulton i pafajshëm.

“I kyçur në qeli, pa gjyq. Ndërkohë që vazhdon kërkimi i provave. Nuk e kam parë konkretisht se çfarë ka bërë Veliaj. Korrupsion nuk kam parë, mbase s’e kam parë unë,” tha Rama.

Kryeministri theksoi se paraburgimi duhet të përdoret vetëm në rastet e veprave të rënda dhe të argumentuara mirë, duke theksuar se nuk mund të arrestohet një kryebashkiak vetëm për ndonjë vendim apo firmë të marrë:

“Merret kryetari i bashkisë, jo për këtë apo atë firmë. Ai është zgjedhur nga populli. Gjykata duhet të gjykojë me prova dhe, nëse është fajtor, të japë dënimin. Nuk mund ta burgosësh se ndihesh i fortë,” tha Rama.

Ai krahasoi situatën e Shqipërisë me vendet e tjera, duke përmendur se numri i paraburgosurve në vend është dukshëm më i lartë se në Belgjikë, pavarësisht se Belgjika ka më shumë kriminalitet.

Rama theksoi gjithashtu nevojën për një qeverisje më serioze të gjyqësorit dhe rolin e Inspektorit të Lartë të Drejtësisë në mbikëqyrjen e këtyre çështjeve. Ai theksoi se transparenca dhe respektimi i procedurave janë çelësi për të ruajtur besimin e qytetarëve në sistemin e drejtësisë.

“Këto janë probleme që duhen marrë seriozisht nga të gjithë: qeverisja e gjyqësorit dhe Inspektori i Lartë i Drejtësisë,” përfundoi Rama.

Deklarata e kryeministrit vjen në një moment kur diskutimet mbi ligjin dhe procedurat e paraburgimit janë në qendër të vëmendjes, sidomos për zyrtarë të lartë të qeverisë dhe kryebashkiakë, duke nxitur debat mbi balancën midis sigurisë dhe drejtësisë.