Kreu i PD-Demokratët Euroatlantikë, Lulzim Basha, në intervistën për gazetën “Tema” foli edhe për vulën e PD ku rikonfirmoi angazhimin për t’i shkuar deri në fund rrugës ligjore. Ai theksoi se Partia Demokratike nuk është klubi partizani që të rrëmbehet nga një person.

Basha gjithashtu tha se është e domosdoshme që shqiptarët, pavarësisht përkatësisë politike, të kenë një alternativë përballë qeverisjes aktuale. Ai shtoi se programi i demokratëve euroatlantikë që është esencialisht kombëtar dhe euroatlantik, do të jetë para të gjithë shqiptarëve.

“Nuk mund të pranojmë padrejtësinë të kthehet në një standart në këtë vend, aq më shumë kur bëhet fjalë për diçka që nuk mund të privatizohet apo të rrëmbehet nga një person i vetëm. Nuk mund ta pranojmë këtë. Partia Demokratike nuk është klubi partizani. Kështu që ne do të bëjmë betejën tonë ligjore deri në fund, dhe njëkohësisht do të ndjekim të gjitha hapat që alternativa jonë, që është një alternativë esencialisht kombëtare dhe euroatlantike, të jetë para të gjithë shqiptarëve. Që shqiptarët, të djathtë, të majtë qofshin, të zhgënjyer me këtë qeverisje, të mllefosur me këtë qeverisje mos të mbeten në kafazin o Rama, o Berisha. Do të ketë alternativë, alternativa do të jemi ne me programin tonë dhe me ekipin tone” – u shpreh Basha.