Kryeministri Edi Rama deklaroi në një mbledhje me kryebashkiakët se ka mbështetur propozimin e ministrit Demo për përdorimin e një fondi prej 20 milionë eurosh, të siguruar nga Emiratet e Bashkuara, në funksion të zhvillimit rural dhe përballimit të emergjencave.
Rama theksoi se një nga faktorët kryesorë që ndikon në situatat emergjente është niveli i ulët i rezistencës së infrastrukturës mbrojtëse, si kanalet e kullimit, argjinaturat dhe hidrovoret. Sipas tij, analiza ka identifikuar pika kritike ku kjo rezistencë është më e dobët, ndaj nevojitet një ndërhyrje e saktë dhe e koordinuar për forcimin e saj, si dhe për rritjen e bashkëpunimit mes pushteteve.
Në këtë kuadër, fondi prej 20 milionë eurosh do të përdoret për blerjen e një flote mjetesh që do të shërbejnë për kullimin dhe pastrimin e kanaleve, në varësi të nevojave të bashkive. Kryeministri solli si shembull pozitiv Dibrën, ku një model i ngjashëm ka funksionuar me sukses.
Sipas Ramës, synimi është rritja e kapaciteteve sipas qarqeve, në mënyrë që mjetet të përqendrohen aty ku ka më shumë emergjenca, ndërsa në ditët normale pune të shërbejnë për mirëmbajtjen e rrjetit kullues dhe argjinaturave. Projekti do të ndiqet dhe zbatohet nga Ministria përkatëse.
