Kreu i Partisë Demokratike, Sali Berisha, ka lëshuar akuza të forta ndaj qeverisë dhe kryeministrit Edi Rama, duke deklaruar se skandali i AKSHI-t, sipas tij, ka marrë përmasa ndërkombëtare dhe po diskutohet gjerësisht në kancelaritë europiane.
Në një deklaratë publike, Berisha tha se situata është “dramatike” dhe se, sipas tij, për AKSHI-n “nuk flitet për gjë tjetër në Europë”, duke e cilësuar këtë institucion si një rrezik serioz për sigurinë kombëtare dhe atë të aleatëve.
“Edi Rama ka përdorur AKSHI-n për të përgjuar dhe kontrolluar jo vetëm çdo qytetar shqiptar, por edhe çdo të huaj në Shqipëri,” deklaroi Berisha, duke shtuar se nga ky institucion janë eksportuar të dhëna sekrete të Shqipërisë dhe të NATO-s drejt organizatave kriminale dhe, sipas tij, edhe armiqve të Aleancës Atlantike.
Sipas ish-kryeministrit, ky veprim përbën një shkelje të rëndë të sigurisë jo vetëm për Shqipërinë, por për gjithë rajonin dhe Europën. Ai e përshkroi AKSHI-n si “një monedhë me dy faqe”, duke përmendur figurën e Lindës së AKSHI-t dhe duke e lidhur atë me familjen e kryeministrit Rama.
Berisha deklaroi se kjo çështje, sipas tij, e ka tronditur dhe dobësuar kryeministrin, ndërsa u bëri thirrje qytetarëve shqiptarë që të reagojnë përmes protestës.
“Shpresa e fundit e Shqipërisë janë qytetarët guximtarë që do të vendosin të protestojnë deri në largimin e Edi Ramës nga pushteti,” tha Berisha, duke e cilësuar 24 janarin si një datë kyçe për rrëzimin e asaj që ai e quajti “regjim” dhe “organizatë kriminale”.
Në përfundim, Berisha ftoi qytetarët e Tiranës dhe të gjithë vendit që më 24 janar, në orën 17:00, të mbushin sheshet dhe rrugët e kryeqytetit, duke e cilësuar protestën si “kryengritje paqësore” kundër qeverisë aktuale.
