Mbështet E Vërteta.al . Nëse mendoni se gazetaria duhet të jetë e lirë, e verifikuar dhe pranë qytetarit, na ndihmoni të vazhdojmë. IBAN – Credins Bank AL50212110090000000002316105 SWIFT/BIC: CDISALTR
Kryeministri Edi Rama, nga Durrësi, ka folur për një sërë reformash të rëndësishme, përfshirë riorganizimin e Kuvendi i Shqipërisë dhe propozimin për uljen e numrit të deputetëve.
Kryeministri bëri të ditur se Partia Socialiste do të nisë një proces diskutimi me qytetarët për këto reforma, i cili do të zhvillohet nga tani deri në fund të qershorit, paralelisht me proceset e brendshme të partisë.
Sipas Ramës, një ndër çështjet kryesore është reduktimi i numrit të deputetëve, për të cilin ai theksoi se, ndonëse është një hap i vonuar, mbetet i realizueshëm përmes një referendumi.
“Ne do zbresim numrin e deputetëve dhe besoj se, edhe pse jemi vonë, kemi ende kohë që t’i thërrasim shqiptarët në referendum,” u shpreh ai.
Kryeministri nënvizoi gjithashtu mungesën e një ligji funksional për referendumet, duke paralajmëruar se qeveria do ta çojë përpara këtë nismë brenda këtij sesioni parlamentar.
Ai shtoi se përmes këtij ligji, qytetarëve do t’u jepet mundësia të shprehen drejtpërdrejt për çështje të rëndësishme për vendin.
