Kryetari i Partisë Demokratike, Sali Berisha, ka bërë akuza të forta publike ndaj ish-zëvendëskryeministres Belinda Balluku, duke pretenduar se ajo po përpiqet të sigurojë shtetësi të huaj për t’i shmangur drejtësisë.

Në një dalje për mediat, Berisha deklaroi se, sipas informacioneve që ai i cilëson si burime qytetare, Balluku ka kërkuar të blejë pasaportë në disa vende, përfshirë edhe përmes investimeve jashtë Shqipërisë.

Ai pretendoi se përpjekjet e saj janë shtrirë në vende të ndryshme, përfshirë rajonin dhe vendet e Gjirit, ndërsa shtoi se disa prej tyre nuk kanë rezultuar të suksesshme.

Gjatë deklaratës, Berisha hodhi akuza edhe ndaj kryeministrit Edi Rama, duke e lidhur atë me çështje të korrupsionit dhe pastrimit të parave. Ai kërkoi nga institucionet ndërkombëtare dhe bankat e huaja që të ndërhyjnë, duke bërë thirrje për ngrirjen e llogarive bankare të Ramës dhe Ballukut.

“Thirrja ime për komunitetin ndërkombëtar është që të mos pranojë kërkesa për shtetësi nga persona të përfshirë në afera të tilla dhe të hetojë burimin e pasurive të tyre,” u shpreh Berisha.

Ai shtoi gjithashtu kritika ndaj sistemit të drejtësisë në vend, duke pretenduar ndërhyrje politike në vendimmarrje dhe mungesë të pavarësisë institucionale.

Deri më tani nuk ka pasur një reagim zyrtar nga Belinda Balluku apo nga qeveria lidhur me këto akuza.