Kreu i grupit parlamentar të Partisë Socialiste, Taulant Balla, ka paditur në Gjykata e Posaçme kundër Korrupsionit dhe Krimit të Organizuar kreun e Partisë Demokratike, Sali Berisha, për veprat penale “fyerje” dhe “shpifje e kryer botërisht”.

Padia vjen pas një postimi të Berishës në rrjetet sociale, ku ai akuzonte Ballën se kishte ndikuar në lirimin nga burgu i Peqinit të Mario Çela, vëllai i Suel Çela.

Në reagimin e tij, Berisha, duke iu referuar një “qytetari dixhital”, pretendonte se Mario Çela ishte dërguar nga burgu në spitalin e Elbasanit dhe se kishte lidhje me Ballën.

Sipas burimeve, padia e Ballës është depozituar për akuzat e parashikuara nga nenet 119/2 dhe 120/2 të Kodit Penal.

Deri më tani, nuk ka një reagim të ri nga Berisha lidhur me padinë, ndërsa pritet që çështja të shqyrtohet nga GJKKO në vijim.