Një kërkesë e pazakontë ka mbërritur këtë të mërkurë në disa redaksi mediash, ku kërkohet heqja e të gjitha raportimeve mbi biznesmenin Dionis Teqja.

Sipas informacionit të bërë publik, urdhri është lëshuar nga gjyqtari Flamur Kapllani, i cili e ka cilësuar kërkesën si “sigurim padie” dhe ka kërkuar fshirjen e lajmeve të publikuara më herët në lidhje me çështjen.

Kërkesa vjen në një moment kur biznesmeni Teqja është përfshirë në një proces gjyqësor me ish-ortakë të tij, ndërsa seancat, sipas raportimeve, nuk janë zhvilluar për shkak të mungesës së tij. Në këtë kuadër, gjykata ka vijuar procedurat e njoftimit publik për palën e paditur.

Ndërkohë, në media është raportuar se ndaj tij janë publikuar njoftime gjyqësore për thirrje në proces, të afishuara edhe në Njësinë nr. 5 në Tiranë, ku ai rezulton të ketë vendbanimin.

Kërkesa për fshirjen e materialeve ka ngritur debat mbi balancën mes vendimeve gjyqësore dhe lirisë së medias, duke nxitur reagime mbi transparencën e informacionit publik dhe të drejtën për informim.

Dionis Teqja njihet si pronar i disa kompanive në vend, përfshirë edhe Megatek.